DILI, 13 setembru 2022 (TATOLI)—Prezidente Repúblika (PR), José Ramos Horta, hateten eskola portugeza Dili Ruy Cinatti ne’e orsamentu hosi Estadu portugés no konsidera katak eskola ne’e ninia kualidade aas tebe-tebes.
“Eskola ne’e eskola portugeza duni buat hotu-hotu orsamentu Estadu portugés, infraestrutura, ba profesór sira, materiál eskolár, buat sira-ne’e hotu tinan-tinan maizumenus euro millaun $5 mak gasta ba eskola ida-ne’e no ha’u konsidera eskola ne’e kualidade aas tebe-tebes,” PR Horta hateten ba jornalista sira partisipa abertura ba eskola portugeza Dili Ruy Cinatti tinan letivu 2022-2023, iha Balide, tersa ne’e.
Tuir Xefe Estadu hateten, eskola ne’e kuaze 100% timoroan liu ona 1000-resin no iha ne’e kualidade aas tebe-tebes, mudansa ne’ebé iha sai hosi ne’e balun asesu eskola kontinua iha Portugál no rai seluk sira simu tanba sertifikadu eskola portugeza ida-ne’e iha rai ne’ebé rekoñesidu iha Europa tomak.
“Ema ne’ebé hetan sertifikadu iha ne’e, nia bele ba eskola França, Itália, Alemaña tuir tratadu Europa nia naran, ho sertifikadu eskola portugeza iha ne’ebé hotu-hotu iha Europa tomak asesu, hanoin ida-ne’e di’ak tebes,” nia hateten.
Iha parte seluk, PR Horta dehan depois iha eskola seluk mak CAFE ne’e iha munisípiu sira iha eziste hotu ida-ne’e mós kualidade di’ak, manorin sira mai hosi li’ur no manorin timoroan balun manán esperiénsia.
“Tantu eskola CAFE nian ha’u hanoin importante,” nia dehan.
Nune’e, PR konsidera eskola portugeza Dili importante tebes kontribui rekursu umanu Timor-Leste nian iha futuru, nune’e nia parte fó apoiu tebes ba eskola portugueza ne’e inklui eskola hotu iha Timor-Leste
“Di’ak tebe-tebes, ha’u apoia eskola ida-ne’e (eskola portugeza Ruy Cinatti) no apoiu eskola hotu-hotu iha rai-laran, nune’e ita-nia Governu tau orsamentu atu dezenvolve liután,” nia dehan.
Diretór Eskola Portugeza Ruy Cinatti, Acacio de Brito, hato’o bem-vindu ba estudante tinan letivu foun hamutuk 1.280.
Jornalista : Nelson de Sousa
Editór : Cancio Ximenes
