iklan

EKONOMIA, BOBONARO, HEADLINE, MUNISÍPIU

EDTL sei troka poste eletrisidade antigu iha kapitál Maliana

EDTL sei troka poste eletrisidade antigu iha kapitál Maliana

Poste eletrisidade antigu lokaliza iha edifísiu Sekretariadu Tékniku Administrasaun Eleitorál (STAE) Bobonaro nia oin, diresaun estrada protokolu Maliana ba to'o Nunura. Imajen Tatoli/Sérgio da Cruz.

BOBONARO, 14 setembru 2022 (TATOLI)-Supervizór Eltrisidade Timor-Leste, Empreza Públika (EDTL,EP) munisípiu Bobonaro, Mário de Jesus, hateten iha tempu badak sei troka no halo manutensaun  ba poste eletrisidade média no baixa tensaun antigu iha kapitál Maliana ho distánsia kilómetru 12.

Nia subliña, poste ne’ebé EDTL planu atu troka ne’e hahú hosi estrada protokolu diresaun Nunura, suku Tapo-Memu to’o bairru Pemancar, suku Lahomea.

parte seluk  hosi bairru Ex Kodim, Suku Ritabou ba to’o Koléjiu nian no hosi área Maumali ba to’o Cailaco mós presiza troka tanba poste balu lahuk ona.

Notísia relevante: EDTL Bobonaro esforsu fornsese eletrisidade ba komunidade Balibo-Atabae

Supervizór ne’e dehan, poste hirak-ne’e iha nesesidade duni atu troka tanba bainhira akontese avaria ruma difikulta tékniku sira halo intervensaun lalais.

“Ami identifika ona poste balu mak la merese ona atu ita uza, ne’e ami tau hotu ona iha lista atu halo manutensaun no troka foun, liuliu iha Maliana Vila tanba poste ne’e ema dehan peninggalan Indonézia nian, ne’ebé iha postu administrativu sira sei la troka tanba iha era uku-aan mak foin implementa,” nia informa ba Jornalista sira, iha kna’ar fatin, Maliana, kuarta ne’e.

Responsavél EDTL Bobonaro ne’e akresenta, bainhira tékniku sira tún ba terrenu atu troka poste hirak ne’e sei hamate provizóriu enérjia eletrisidade.

“Ami tenke fiksu ho oráriu ahi mate labele kleur, tanba kuandu ahi mate kleur nia impaktu ne’e ba ami-nia reseita EDTL nian,” nia dehan.

Komunidade Maliana, Armando de Jesus, sente kontente tanba EDTL tau ona prioridade atu troka poste antingu hirak-ne’e.

“Ami durante ne’e haree besi-riin sira ne’e barak mak ferujen hotu, komesa hosi rotunda nian ba to’o Soso. Ida-ne’e presiza troka duni, sé lae udan ka anin boot mak monu tohar tiha bele fó ameasa ba ema-nia vida, depois ahi mós bele han ema-nia uma,” nia akresenta.

Tuir dadus estatístika 2020, munisípiu Bobonaro iha aldeia 193, suku 50, postu administrativu neen, kompostu hosi Atabae, Balibo, Cailaco, Maliana, Bobonaro no Lolotoe, ho totál populasaun 128,522 komposta hosi feto 57,835, mane 70,687 ho totál xefe família 28,940.

Notísia releventa: EDTL,E.P Bobonaro nota instituisaun Estadu la selu eletrisidade

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!