DILI, 14 setembru 2022 (TATOLI)–Instalasaun liña internet ba eskola iha munisípiu Dili Bobonaro no Baucau atinje ona 40%, ne’ebé instalasaun ne’e sei abranje mós eskola iha munisípiu sira seluk bainhira munisípiu tolu ne’e iha ona progresu signifikante.
Diretór Jerál Administrasaun no Finansa hosi Ministériu Edukasaun Juventude no Desportu (MEJD), Antoninho Pires, relata, planu ida-ne’e konsidera pilotajen hela.
“Instalasaun liña internet ba eskola iha munisípiu tolu la’o ona. Instalasaun ne’ebé ita halo daudaun atinje ona 40%. Bainhira munisípiu tolu ne’e hetan progresu maka ita sei tama fali ba eskola sira iha munisípiu seluk,” Diretór relata ba Agência Tatoli, iha ninia knaar fatin, MEJD Vila Verde, kuarta ne’e.
Notísia relevante: MEJD planea instala liña internet iha eskola sira
MEJD halo kontratu ho empreza telekomunikasaun Telemor no Telkomcel ba prosesu instalasaun liña internet ba eskola sira.
“Operadór rua ne’e daudaun hala’o hela servisu iha terrenu. Fiar katak sei finaliza servisu iha tempu besik atu eskola sira bele hala’o ona operasaun liña internet. Importante maka ita presiza velosidade internet labele lentu atu nune’e bele fasilita estudante no profesór sira. Planu ida-ne’e sei instala hotu iha eskola sira maibé benefisiáriu ne’ebé atu utiliza meiu ne’e ba estudante ensinu báziku terseiru siklu no ensinu sekundáriu sira inklui profesór,” nia tenik.
Iha fatin ketak, Diretór Servisu Edukasaun Munisípiu Baucau (DSEMB), Augusto Ornai Ximenes, informa, operadór rua daudaun ne’e hala’o hela servisu iha terrenu maibé parte diresaun seidauk simu dadus eskola ne’ebé sai benefisiáriu ba programa ne’e.
“Ha’u husu ona ita-nia operadór rua, sira sei halo lista sira maka ha’u informa ba públiku. Maibé ha’u hakarak dehan instalasaun liña internet ne’e la’ós ba eskola hotu tanba ida-ne’e foin planu pilotu, ne’ebé eskola balun de’it mak hetan,” nia tenik.
Jornalista : Tomé Amado
Editora : Julia Chatarina
