DILI, 01 Juñu 2026 (TATOLI)—Ministru Defeza, Kontra Almirante Donaciano do Rosário da Costa Gomes ‘Pedro Klamar Fuik’, hateten, Reuniaun Ministru Defeza Komunidade Paíz Lian Portugés (CPLP, sigla portugéz) ba dala-25, ne’ebé sei realiza iha Dili, iha Tersa (02/06), iha Otél Palm Spring, sei destaka importánsia pás, diálogu, no kria estabilidade.
“Prinsípiu CPLP mak ida dezenvolve rai iha ámbitu pás, diálogu no kria estabilidade iha fatin hotu ne’ebé mak CPLP nia espasu interrese, ida-ne’e mak sai hanesan fatór prinsipál ba reuniaun agora,” Pedro Klamar Fuik hato’o ba Jornalista sira hafoin simu audiénsia husi Ministru Defeza São Tomé e Princípe, Horacio de Sousa, iha edifísiu Ministériu Defeza, Fatuhada, Segunda ne’e.
Nia dehan, nasaun CPLP nu’udar amigu di’ak ba Timor-Leste tanba fó tulun hahú kedan iha tempu difísil.
“Paises amigos CPLP sira hotu inkluzivamente São Tomé e Princípe iha ita-nia istória libertasaun iha tempu difísil, sira hotu hamutuk ho ita, sira hamoris ita-nia problema sira, hamoris ita-nia sentimentu, hamoris ita-nia terus no sira solidariza ita, no sira fó apoiu hotu,” nia akresenta.
Notísia relevante : Delegasaun CPLP vizita eskola Amigavel CPLP Dili, reforsa kooperasaun edukativa iha espasu luzófonu
Tinan ne’e importante ba Timor-Leste tanba bele prezide reuniaun nível ministeriál CPLP, ne’ebé liuhusi reuniaun ida-ne’e bele tulun malu partilla no halo diskusaun hodi lori pás, estabilidade no promove diálogu ba nasaun membru iha ne’ebé de’it atu kontribui pás iha mundu.
Aleinde ne’e, CPLP ne’e importante ba Timor-Leste tanba depoizde Independénsia sira fó nafatin apoiu.
“Maibé tanba istória CPLP ne’e tau hamutuk. Ita halo reuniaun para ita bele ko’alia ba malu no rona hanoin sira, problema no hakarak para atu hanoin hamutuk saida mak ita bele halo di’ak liu atu mundu ne’e di’ak liu. Mas prinsípiu CPLP mak dezenvolve rai CPLP iha ámbitu pás, diálogu no kria estabilidade iha fatin hotu ne’ebé mak CPLP nia espasu interrese, ida-ne’e mak sai hanesan fatór prinisipál ba reuniaun agora,” nia katak.
Molok atu realiza reuniaun, Ministru Defeza CPLP, Ministru sira husi São Tomé Princípe, Ministru Horacio Trindade de Sousa mai komprimenta Ministru Defeza Timor-Leste.
Iha Tersa (02/06) kontinua ho reuniaun Ministru Defeza CPLP ba dala-25, ne’ebé tuir ajenda sei prezide husi Kontra Almirante Donaciano do Rosário no partipa husi Ministru Defeza membru CPLP Angola, João Ernesto dos Santos, Ministru Defeza São Tomé e Príncipe, Horácio de Sousa, Ministru Defeza Brazil Jenerál, Almirante R. de R. Freire, Sekretária Estadu Portugal, Ana Isabel Xavier no Ministru Defeza Moçambique, Cristóvão Artur Chume.
Jornalista : Natalino Costa
Editora : Julia Chatarina
