iklan

HEADLINE, SAÚDE

MS-PAM hahú prepara estratéjia hodi kombate moras dengue

MS-PAM hahú prepara estratéjia hodi kombate moras dengue

Diretór Nasionál Saúde Públika iha Ministériu Saúde Frederico Bosco, Imajen Tatoli/Dok

DILI,14 setembru 2022 (TATOLI)– Ministériu Saúde (MS) hamutuk ho Autoridade Munisípiu Dili (PAM), hahú prepara estratéjia hodi kombate moras dengue iha munisípiu Dili.

“Ita halo kordenasaun ho autoridade sira inklui liña ministerál sira husi munisípiu Dili atu oinsá prepara di’ak liuliu ba asaun kombate moras dengue nian munisípiu Dili,” hateten Diretór Nasionál Saúde Públika, Frederico Bosco, bainhira ramata enkontru ho autoridade munisípiu Dili,iha salaun servisu saúde Munisípiu Dili, Bairru dos Grilos, kuarta ne’e.

Iha fulan ikus tinan 2021 no inísiu tinan 2022 kazu dengue sa’e maka’as iha munisípiu ne’ebé konsege afeta ba sidadaun 5.000 no hamatek ema na’in-57 no kazu ne’ebé mak relata hamutuk 5.000.

Nune’e, nia dehan presiza prepara estratéjia no asaun sira hanesan prepera ai-moruk fumigasau, abate, sosializasaun ba komunidade atu hamoos ambiente atu tempu udan monu rai bele prevene moras dengue iha territóriu nasionál.

“Semana ida ne’ e, ekipa saúde sei tama sai bairru hodi aviza ba komunidade sira atu limpeza bainhira udan monu rai,” nia afirma.

Iha fatin hanesan, Reprezentante Autoridade Munisípiu Dili Júlio Manuel, hateten ho enkontru ida ne’e oinsá atu halo preparasaun ba moras dengue antes udan monu rai.

“Iha postu administativu sira ita mós iha maun de obra, entaun hahú hamoos baleta sira no bee nalihun karik hamoos hodi halo prevensaun sedu bainhira udan monu rai. Tanba Ita hahú aviza ona ba komunidade hamoos uma ninin baleta sira, hamoos tanke bee, atu nune’e labele hamosu tan probrema ba kazu dengue,” nia afirma.

Jornalista : Felicidade Ximenes

Editór      : Florencio Miranda Ximenes

iklan
iklan

Leave a Reply

iklan
error: Content is protected !!