iklan

HEADLINE, SEGURANSA

PNTL: operasaun konjunta konsege halo Dili hakmatek

PNTL: operasaun konjunta konsege halo Dili hakmatek

Komandante PNTL Munisípiu Dili, Superintendente Xefe, Henrique da Costa. Imajen Tatoli/Eugénio Pereira

DILI, 14 setembru 2022 (TATOLI)— Komandante Polisia Nasionál Timor-Leste (PNTL) Munisípiu Dili, Superintendente Xefe Henrique da Costa, konsidera operasaun Konjunta entre instituisaun Polísia Nasionál Timor-Leste (PNTL) ho FALINTIL-Forsa Deza Timor-Leste (F-FDTL), nu’udár medida ba prevensaun konflitu iha rai-laran.

Operasaun Konjunta ne’e, Komandu F-FDTL no PNTL hala’o bazeia ba despaisu ka diretiva ho númeru 01/MI-MD/IX/2022, hodi autoriza PNTL no F-FDTL halo operasaun atu  prevene krime sira ne’ebé perturba orden públiku.

Notísia relevante: Dom Virgílio Kardeál husu grupu arte-marsiál promove dame

Rezolusaun Governu tama iha vigór, hahú hosi data asinatura no termina to’o iha tuku 23:59, loron 13 setembru tinan 2022, ne’ebé bele renova karik mosu komportamentu sira relasiona ho asuntu ida-ne’e.

Nune’e, ho operasaun konjunta ne’ebé hala’o durante semana ida, konsege responde preokupasaun sidadaun sira tanba situasaun iha kapitál Dili hakmatek no laiha violénsia ruma mosu iha sosiedade nia le’et.

“Hosi operasaun konjuntu ne’e, ita haree iha área risku konflitu sira situasaun hakmatek. Tanba alende operasaun konjunta, PNTL Dili rasik halo sosializasaun ba eskola sira kona-ba prevensaun konflitu ba estudante sira no konsensializa estudante sira atu prevene konflitu iha sira nia hela fatin,” Komandante PNTL Munisípiu Dili, ba jornalista sira iha  Komandu PNTL Dili Caicoli, kuarta ne’e.

Komandante PNTL munisípiu Dili hato’o kestaun ne’e bainhira hala’o enkontru avaliasaun ba implementasaun Operasaun Konjunta ho Komandante Sentru Formasaun Polisia (CFP, sigla portugés), Komadante Unidade Epesiál Polisia (UEP), Komandante Unidade Marítima Polisia (UPM), Reprezentante Komandu Jerál PNTL.

Durante operasaun konjunta laiha difikuldade ne’ebé mak fó impedimemntu ba membru F-FDTL no PNTL sira iha tereñu, maske iha oituan mak material lojístika.

“Maibé, ita nia operasaun konjunta ne’e iha progresu pozitivu tebes, tanba iha munisípiu Dili, liuliu iha área hirak ne’ebé durante ne’e risku ba konflitu, ho operasaun ne’e krime hahú menus no bairru sira hahú hakmatek,” relata Superintendente Xefe Henrique.

Alende ne’e, nia akresenta iha ezekusaun operasaun konjunta ne’e PNTL uza rasik nia-osan tanba laiha fundu espesiál ba operasaun ne’e.

“Ita laiha fundu atu aloka espesiál ba iha operasaun ne’e, iha ne’e ita ezekuta osan operasionál de’it liuliu osan  han $10 ne’ebé kada fulan membru PNTL hetan,” katak.

Hatan kona-ba operasaun konjunta ne’e sei estende, Komandante Munisípiu Dili ne’e dehan ne’e kompeténsia no desizaun hosi Komandu F-FDTL no PNTL nian.

“Ha’u nia parte hanesan Komandante Munisipiu Dili, ne’ebé lidera mós operasaun konjuntu iha área juridisaun Dili nian, Ha’u rellata ona relatóriu progresu operasaun konjuntu iha Dili ba Komadante Jerál atu haree, hosi ne’e mak komandu sei avalia no deside operasaun konjuntu iha nesesidade atu kontinua ka lae, ne’e superiór sira maka foti desizaun,” nia konklui.

Notísia relevante: Governu husu GAM no GAR kontribui ba pás no estabilidade

Jornalista: Natalino Costa

Editór     : Florencio Miranda Ximenes

iklan
iklan

Leave a Reply

iklan
error: Content is protected !!