iklan

HEADLINE, SAÚDE

Populasaun rihun 200 iha Dili simu ona vasina vasina Booster Pfizer

DILI, 14 setembru 2022 (TATOLI)— Populasaun hamutuk 200.000 iha Munisípiu Dili, simu ona vasina Booster Pfizer ka doze datoluk hodi hasa’e imunidade hasoru  COVID-19 iha Timor-Leste.

Governu liuhosi Ministériu Saúde lansa vasina Booster Pfizer hahú hosi janeiru to’o fulan setembru ne’e konsege vasina ona populasaun rihun 200 iha kapitál Dili.

“Daudaun ne’e vasina datoluk ita kontinua implementa iha postu vasina  sira iha munisípiu  Dili no ita nia populasaun  hamutuk 200.000 mak hetan vasina Booster Pfizer ne’e,” Diretora Servisu Saúde Munisipiu Dili, Agostinha Segurado, hateten iha nia kna’ar fatin Servisu Saúde Munisípiu Dili, kuarta ne’e.

Populasaun sira ne’ebé hakarak simu vasina doze dahuluk, daruak no datoluk bele hakbesik aan postu saúde sira iha munisípiu Dili.

“Ita nia populasaun ne’ebé hakarak  vasina bele hakat ba fasilidade saúde ne’ebé mak besik hodi hasa’e imunidade ema ida idak-nian hasoru COVID-19,” nia afirma.

Alende ne’e, Ekipa Saúde munisípál mós kontinua vasina Pfizer ba estudante sira ho idade 12 to’o menus 17.

“Ita foin daudaun iha problema mak eskola sira feriadu, entaun ita la konsegue vasina, maibé agora eskola tama fali, nune’e ita kontinua halo vasinasaun ba estudante sira ne’ebé mak seidauk simu doze dahuluk no daruak nian,” katak nia.

Servisu Saúde Munisípiu Dili iha tarjetu ba númeru  estudante  hamutuk  42.560  mak tenke simu vasina, maibé daudaun ne’e  sa’e ba 43.000, signifika ekipa saúde sira servisu  di’ak tebes hodi atinje liu ona tarjetu sira ne’e.

Populasaun elijível tinan 18 ba leten, ne’ebe simu ona vasina to’o iha loron 13 setembru, tuir sistema informasaun Saúde iha Ministériu Saúde, hanesan kumulativu 1ª doze iha Dili iha 86,6% no kumulativu 2ª doze iha Dili hamutuk 81,5%.

Enkuantu, Sidadaun iha territóriu nasionál ne’ebé simu ona vasina doze dahuluk iha Timor-Leste 84,6% no simu ona doze daruak, 72,1%.

Nune’e, hahú 21 marsu 2020 to’o 13 stembru 2022 iha kumulativu kazu konfirmadu 22.860 no óbitu 133.

Jornalista : Felicidade Ximenes

Editór        : Florencio Miranda Ximenes

iklan
iklan

Leave a Reply

iklan
error: Content is protected !!