VIQUEQUE, 14 setembru 2022 (TATOLI)–Xefe sentru saúde Ossu, Elsa Esperansa Monteiro, informa, sentru saúde postu ne’e rejista moras Invesaun Vias Respiratória Aguda (ISPA) hamutuk 2.000 iha janeiru to’o agostu.
“Ami rejista moras ho númeru a’as liu maka ISPA hamutuk 2.000 no moras sira seluk hanesan moras kulit no diareia maibé númeru kiik kompara ho moras ISPA,” Xefe sentru saúde Ossu hateten iha ninia knaar fatin, kuarta ne’e.
Pasiente sira konsege hetan tratamentu di’ak hosi pesoál saúde sira iha sentru saúde Ossu.
“Ha’u hanoin moras ISPA ho númeru a’as tanba impaktu hosi rai rahun sira daudaun iha tempu bailoron hodi fó impaktu maka’as ba komunidade. Impaktu seluk mak dalaruma ita-nia komunidade konsumu bee la tasak, ida-ne’e mós fó impaktu ba moras ISPA,” nia esplika.
Notísia relevante: Postu saúde Uaitame rejista ISPA 200 durante fulan-hitu
Sentru saúde Ossu nafatin kria mikro plan ne’ebé adekuadu hodi tama-sai uma hodi halo atendimentu ba komunidade.
“Ha’u hakarak fó hanoin ba komunidade tenke kuidada saúde, bainhira la’o iha rai rahun tenke uza máskara no konsumu bee tasak, nune’e ita bele hakdook-an hosi moras ISPA ne’ebé rejista iha sentru saúde, hosi suku 10 iha postu administrativu Ossu,” nia tenik.
Tuir dadus, pesoál saúde ne’ebé destaka iha sentru saúde Ossu hamutuk na’in-39, kompostu hosi médiku 12, enfremeiru 17, no parteira ualu. Hosi postu administrativu Ossu, suku hamutuk 10 no aldeia 63, ho totál abitante 17.021.
Jornalista : Vitorino Lopes da Costa
Editora : Julia Chatarina
