iklan

DESPORTU, COVALIMA

Administradór Suai halo abertura jogu juvenil no festival sub-12 iha Covalima

Administradór Suai halo abertura jogu juvenil no festival sub-12 iha Covalima

Administradór postu administratvu Suai, Luzino do Rego, halo abertura ba jogu sub-12 no festival sub-12 hodi xuta bola dahuluk iha kampu futeból Ladi. Imajen Tatoli/Celestina Teles.

COVALIMA, 15 setembru 2022 (TATOLI)–Administradór postu administrativu Suai, Luzino do Rego, hala’o abertura ba kompetisaun jogu juvenil sub-12 hodi dezenvolve talentu juvenil no promove jogu festivál sub-12 iha nivél munisípiu ne’ebé organiza hosi Centru Treinamentu Futeból Juvenil Timor-Leste (CTFJTL).

“Ita-boot sira tuir kompetisaun ba jogu juvenil sub-12 ne’ebé ho idade ne’ebé mak sei kiik bele hetan oportunidade hodi hola parte iha jogu juvenil no festival sub-12 iha Covalima. Ita-boot sira  hatudu iha tinan kotuk kompetisaun nivél rejional ne’e, ita okupa primeiru lugar no jogu iha nivél nasionál ita okupa terseiru lugar,” Luzino do Rego hato’o liuhosi nia diskursu iha kampu Ladi, kinta ne’e.

Sentru treinamentu sira iha Covalima hatudu ona nia rezultadu ne’ebé hanesan orgullu boot ba Covalima-oan, nune’e bele mantein nafatin atu iha jogu nivél nasional karik, Covalima bele okupa primeiru lugar.

“Ita-nia esperensa, jogu iha nivél rejionál no nasionál, saida mak hetan ona iha tinan kotuk ita mantein no iha nivel nasionál bele kontinua hodi okupa fali iha primeiru lugar,” nia dehan.

Maske ohin partisipa jogu sub-12 no festival sub-12 ho idade ne’ebé sei kiik maibé tenke mantein dixiplina iha fatin treinu, fiar no rona orientasaun hosi treinadór hosi klubu sira.

Vise Prezidente Centru Treinamentu Futeból Juvenil Timor-Leste Nasionál, Agostinho Mesquita Martins, enkoraja jogadór sub-12 sira atu hakas-an hodi bele dezenvolve an di’ak liután iha mundu futeból.

“Ha’u husu ba Covalima-oan sira atu hakas-an hodi bele dezenvolve di’ak liután. Ha’u triste tanba jogadór Covalima-oan ema laiha tanba bainhira Covalima mak joga iha nasionál adeptu barak,” nia apela.

Prezidente Asosiasaun Foteból Covalima (AFC), Agostinho Henrique, hateten ohin sentru treinamentu juvenil Covalima hahú halo abertura ne’ebé hakerek iha jornada asosiasaun futeból sentru treinamentu juvenil iha Timor-Leste realiza kompetisaun ba daruak nian.

“Ohin hakerek iha jornada hodi hahú loke kompetisaun juvenil atu hadi’a talentu joven sira liuhosi jogu no festival sub-12 ne’ebé hala’o durante semana ida iha Covalima. Ha’u orgullu tanba futeból nia moto laiha fronteira,” nia esplika.

Sentru juvenil agora bele halo nia espansaun la’ós iha Covalima de’it maibé iha territóriu hotu, atu nune’e mellora di’ak liután iha futuru futeból iha munisípiu Covalima.

Ho nune’e, husu ba jogadór sira atu tau aas joga fair play iha kompetisaun ida-ne’e, la’ós buka de’it manan no lakon maibé hatudu nafatin talentu.

“Autoridade tenke fó nafatin motivasaun no apoiu no sentru juvenil mesak labele la’o, tanba ba futuru ita sei hadi’a futeból neineik maibé beibeik,” nia hateten.

Kompetisaun jogu sub-12 no festival sub-12 ne’e partisipa hosi jogadór sira mai hosi klubu sira hanesan sentru juvenil Ladi, sentru Luka Lay, sentru Lafaek, klubu Levante, klubu Fohoterin no klubu Lolowa.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!