Konstrusaun fíziku edifisíu Postu Administrativu Maucatar atinje ona 93,56%
COVALIMA, 15 setembru 2022 (TATOLI)–Diretór Planu Dezenvolvimentu Integradu Munisipál (PDIM), Afonso Nogueira Nahak, relata progresu konstrusaun fizíku edifísiu Postu Administrativu (PA) Maucatar atinje ona 93,56%.
“Implementasaun konstrusaun Projetu Planu Dezenvolvimentu Integradu Munisipál (PDIM) tinan fiskál 2021 mai to’o 2022 ne’ebé hala’o mak projetu konstrusaun edifísiu postu administrativu Maucatar ne’ebé nia progesu fizíku atinje ona 93,56% no konstrusaun rezidénsia administradór ne’e ninia progresu fíziku atinje ona 63,66%. Ita hein projetu rua ne’e finaliza iha tinan ne’e,” Afonso Nogueira Nahak informa ba Agência Tatoli iha salaun administrasaun, Sukaer Laran, kinta ne’e.
Bazea ba monitorizasaun kontrusaun edifísiu postu adminisrativu Maucatar ninia progresu atinje ona 93,56%, nune’e iha fulan-setembru ne’e finaliza ona konstrusaun no fulan outubru bele entrega ona.
Maibé, konstrusaun ba rezidénsia Administradór munisípiu Covalima ninia ne’e, konstrusaun fíziku foin mak atinje 63,66%, nune’e husu ba kompañia atu aselera lalais no iha fulan-outubru bele entrega.
“Konstrusaun rezidénsia administrasaun mak seidauk. Ita husu ba kompañia bele aselera, espesiál ba konstrusaun residénsia. Ita hein katak fulan-outubru tenke aselera no iha novembru finaliza ona,” nia dehan.
Tanba, oras ne’e daudaun halo hela mobilizasaun ba sira-nia ekipamentu, nune’e tinan ne’e bele finaliza ona tanba Governu iha kompromisu tenke finaliza pagamentu iha tinan ne’e no tinan oin 10% ne’e ba retensaun de’it.
Konstrusaun edifísiu Postu Administrativu Maucatar konstrui hosi kompañia Sabudoi Unipesoál, Lda, ho durasaun tempu durante fulan neen (6) ne’ebé hahú hala’o lansamentu iha loron 05 janeiru 2022.
Konstrusaun rezidénsia Administradór munisípiu Covalima ho nia medida 30,70×22,50 ne’ebé konstrui hosi kompañia verde Caisae Unipesoál, Lda, ho nia durasaun tempu durante fulan neen (6) mós.
Tuir livru 3B, Orsamentu Jerál Estadu tinan fiskál 2021, munisípiu Covalima prevee konstrusaun ba rezidénsia administradór munisípiu Covalima hamutuk $262,570 no konstrusaun edifísiu postu administrativu Maucatar ho moru haleu hamutuk $179,438.
Jornalista : Celestina Teles
Editór : Cancio Ximenes
