DILI, POLÍTIKA

PR Horta: dezde uluk Malázia apoiu Timor-Leste atu adere ba ASEAN

PR Horta: dezde uluk Malázia apoiu Timor-Leste atu adere ba ASEAN

PR Horta partisipa iha komemorasaun loron independénsia Malázia ba dala-65 iha Hotel Novo Turizmu, kinta (15/09). Imajen/Mídia PR.

DILI, 15 setembru 2022 (TATOLI)-Prezidente Repúblika (PR), José Ramos Horta, hateten Timor-Leste nia kooperasaun bilateral ho Malázia di’ak tebes tanba dezde uluk kedas Malázia apoiu Timor-Leste atu adere ba ASEAN.

“Ita-nia kooperasaun ho Malázia di’ak tebes, Nasaun ho komunidade di’ak loos no dezde uluk kedas Malázia apoiu ita atu tama ASEAN. Tantu Malázia relasaun di’ak, ha’u sei buka aumenta liután relasaun ho sira,” PR Horta hateten ba jornalista sira bainhira patisipa iha komemorasaun loron independénsia Malázia nian ba dala-65 iha ótel Novo Turizmu, kinta ne’e.

Xefe Estadu ne’e hateten, Malázia hanesan rai ida apoiu Timor-Leste (TL) makaas hahú kedas iha tinan 2000 ho forsa da pás Malázia nian no iha krize 2006 sira haruka sira-nia forsa mai.

“Primeiru-Ministru, Mahatir, Primeiru-Ministru ASEAN nian mai vizita ita no fó apoiu makaas. Hanesan uluk sira oferese kilat mai iha ita-nia forsa armada primeiravés ne’e ba ita, nein iha osan atu sosa,” nia dehan.

Prezidente Repúblika mós planea ona sei halo vizita ba Malázia oinsá buka aumenta relasaun  bilaterál Timor-Leste ho Malázia.

“Seida’uk ba tanba agora sira iha inserteza polítika tanba eleisaun atu mai no lahatene loos bainhira, tanba sira-nia sistema Parlamentu ho Primeiru-Ministru Rei mak deside eleisaun maibé besik ona.  Entaun ha’u ko’alia ho sira liu tiha mak ha’u ba vizita Malázia,” nia hateten.

Nune’e, Ramos Horta kongratula loron independénsia Malásia nian no sente kontente mai hamutuk ho embaixada Malázia hodi komemora loron indenpedénsia ne’e.

“Ha’u partisipa iha embaixada ba rai hotu-hotu, eventu ruma ita hatudu respeitu amizade ba sirarai ki’ik ka boot no riku ka la riku tenke respeita,” nia dehan.

Iha fatin hanesan, Charge Affaires Embaixada  Malázia iha TL, Nadia Azura Mohd Nudri, hateten embaixada hamutuk ho sidadaun ka família Malázia iha Timor-Leste besik 100 sente kontente  hodi komemora loron independénsia Malázia ba dala-65 ne’e iha Timor-Leste.

Nia hatutan, relasaun bilaterál ho Timor-Leste durante ne’e servisu hamutuk pozitivu tebes iha aspeitu  oioin  inklui apoiu adezaun TL ba ASEAN, nune’e ba oin sei aumenta liután kooperasaun entre nasaun rua iha área dezenvolvimentu.

Jornalista : Nelson de Sousa

Editór     : Cancio Ximenes

iklan
iklan

Leave a Reply

iklan
error: Content is protected !!