iklan

HEADLINE, MUNISÍPIU, VIQUEQUE

UNDP apoia ekipamentu informátika ba VPU Viqueque hodi reforsa servisu

UNDP apoia ekipamentu informátika ba VPU Viqueque hodi reforsa servisu

Komadante PNTL munisípiu Viqueque entrega ekipamentu informátika ba membru VPU sira, kinta (15/09). Imajen Tatoli/Vitorino Lopes da Costa

VIQUEQUE, 15 setembru 2022 (TATOLI)—Programa das Nações Unidas para o Desenvolvimento (UNDP, sigla inglés) apoia ekipamentu informátika hanesan komputadór no mákina imprimi ba Unidade Pesoál Vulnerável (VPU) iha postu postu lima, munisípiu  Viqueque hodi reforsa servisu.

“Ami hetan apoiu ekipamentu komputadór no mákina imprime hosi UNDP hodi reforsa servisu membru sira. Nune’e apoiu sira-ne’e distribui ba VPU ne’ebé destaka iha postu administrativu lima, iha munisípiu Viqueque hodi reforsa servisu ba atendimentu ema vulnerável sira,” Komadaten VPU nasionál, Inspetór Polísia Nasionál Timor-Leste (PNTL), Ricardo da Costa, hateten, ba Ajénsia Tatoli, iha Komandu PNTL, munisípiu Viqueque, kinta ne’e.

Notísia relevante: UNDP entrega ekipamentu médiku ba MS

Ekipamentu informátika ne’e fornese ba Eskuadra PNTL postu lima hanesan Viqueque vila, Ossu, Lacluta, Uatulari no Uatucarbau, ne’ebé kada eskuadra ida simu komputadór ida no makína imprime ida.  

Komandante VPU nasionál relata, ekipamentu hirak ne’e ho intensaun atu fasilita servisu VPU tanba durante ne’e ekipamentu laiha no difikulta membru sira.

“Dalabarak bainhira ami halo enkontru ho rede referál sira, ha’u sempre kestiona katak vítima ida sai mós vítima ba prosesu tanba ninia parseiru halo ona agresaun. Depois vítima ba hato’o keixa, loloos ne’e tenke ba Ministériu Públiku maibé ho limitasaun ekipamentu maka VPU sira foti nota hakerek ho liman de’it, hafoin membru sira lori ba kuartél hatama iha sistema hotu no lori fali ba fó ba vítima sira asina, hafoin rejistu iha Ministériu Públiku,” nia akresenta.

Prosesu lori tempu maka foin kazu tama iha Ministériu Públiku. Tanba ne’e dala barak vítima sira sempre halerik ba sira-nia kazu to’o ona iha ne’ebé, maibé menus fasilidade maka prosesu kazu sempre tarde.     

“Ha’u agradese ba UNDP ne’ebé fó ona apoiu ekipamentu ba membru VPU sira hodi aselera prosesu rejistu kazu. Membru VPU sira tenke utiliza ekipamentu sira-ne’e ho di’ak hodi fó atendimentu  ba komunidade,” nia tenik.

Jornalista    : Vitorino Lopes da Costa

Editora         : Julia Chatarina

iklan
iklan

Leave a Reply

iklan
error: Content is protected !!