DILI, 16 setembru 2022 (TATOLI)–Kandidatu seminarista menór Balide hamutuk 150 hosi Dioseze Dili, Baucau no Maliana hahú ona teste eskrita, ne’ebé kandidatu hirak ne’e hosi estudante finalista ensinu báziku siklu 3 no estudante finalista ensinu sekundáriu tinan akadémiku 2022.
“Tinan akadémiku 2023 ne’e ita kontinua loke tan teste ba kandidatu seminarista foun hamutuk 150. Ida-ne’e hanesan tradisaun ne’ebé kada tinan iha fulan-setembru ita sempre halo ba seminarista foun sira,” Diretór Semináriu Menór Nossa Senhora de Fatima Balide (SENOFA), Padre Natalino da Costa Soares, relata, sesta ne’e.
Tuir Diretór, kandidatu sira ne’ebé hili dalan hakarak sai seminarista iha SENOFA ne’e la signifika tenke pasa hotu iha teste ne’e, maibé tenke prienxe rekezitu ho valór 7,0 mak pasa.
“Maski iha kandidatu 150 maka tuir ona teste, maibé ita presiza de’it 100, ne’ebé kompostu hosi seminarista ensinu sekundáriu 80 no ba tinan preparasaun hamutuk 20.
Notísia relevante: Segunda, Semináriu Menór Balide sei Hahú Prosesu Aprendijazen
Matéria teste ne’ebé kandidatu seminarista foun sira tenke prienxe iha teste eskrita ne’e maka hanesan inglés, portugés, matemátika no relijiaun, hafoin maka iha mós teste atu hatene kapasidade kandidatu sira.
Kandidatu sira ne’e molok hetan fatin hodi tuir teste eskrita iha loron 16 setembru 2022 ne’e, sira hatama ona dokumentu importante sira antes liuhosi kada parokia iha Dioseze tolu, hanesan rekomendasaun padre parokia nia atu garante kandidatu sira-nia kapasidade, partisipasaun iha atividade igreja, no labarik di’ak nunka falta misa iha loron domingu.
“Hosi rekomendasaun sira ne’e maka ami sei tau-atensaun hodi haree rezultadu teste kandidatu nian ne’ebé iha momentu balun ami sei haree entre valór no rekomendasaun hodi bele ajuda foti mós desizaun,” nia tenik.
Padre Natalino da Costa Soares nu’udar Diretór SENOFA foun ne’ebé foin maka simu knaar ba loron-haat, maibé nia simu ona informasaun katak totál seminarista menór Balide daudaun provizórimente entre 185 to’o 192.
Jornalista : Tomé Amado
Editora : Julia Chatarina
