MAPKOMS sei diskute ho PM kona-ba estabelesimentu Institutu Formasaun ba Jornalista

DILI, 16 setembru 2022 (TATOLI)—Ministru Asuntu Parlamentár no Komunikasaun Sosiál (MAPKOMS), Francisco Martins Pereira Jerónimo, informa nia parte simu ona relatóriu hosi Sentru Formasaun Téknika Komunikasaun (CEFTEC-sigla portugés) no sei hasoru Primeiru-Ministru (PM), Taur Matan Ruak, hodi diskute kona-ba estabelesimentu Institutu Formasaun ba Jornalista iha Timor-Leste.

Notísia Relevante: CEFTEC submete ona relatóriu estabelese institutu formasaun jornalista ba MAPKOMS

“Ha’u simu ona relatóriu estabelesimentu institutu formasaun ba jornalista hosi CEFTEC) maibé ha’u sei haree lai posibilidade, depois sei ko’alia ho Primeiru-Ministru. Tanba, ita atu halo buat ida tenke informa posibilidade sira-ne’e ba Primeiru-Ministru hodi hanoin, tanba ne’e mós la’os buat kiikoan. Ne’ebé, ha’u simu ona relatóriu no haree ona, depois ha’u sei ko’alia ho Primeiru-Ministru,” Francisco Jerónimo, hateten ba Ajénsia Tatoli, iha salaun Ministériu Saúde (MS) Caicoli, Dili, sesta ne’e.

Tuir nia, relatóriu hosi Sentru Formasaun Téknika Komunikasaun (CEFTEC-sigla portugés) ba Estabelesimentu Institutu Formasaun ba Jornalista ne’e, hanesan relatóriu informátivu kona-ba semináriu no opiniaun sira atu harii institutu refere.

Maibé, tuir nia, estudu ida kle’an kona-ba impaktu hosi ninia estabelesimentu ne’e rasik, ida-ne’e la ko’alia klaru iha ne’ebá relatóriu nia laran liu-liu ko’alia kona-ba entermu ekonómika no sustentabilidade ba futuru ne’e oinsá maibé ko’alia de’it mak tenke harii.

Tanba ne’e, Governu labele hanoin de’it ida-ne’e no Governu mós tenke hanoin kle’an liu, oinsá ninia kuntinuidade, impaktu ba futuru no oinsá mak iha relasaun ho estabelesimentu sira-ne’ebé mak oras ne’e iha, tanba ko’alia kona-ba institutu ne’e labele haluha institutu nia formasaun akademika oinsá ka formasaun baibain.

“Ne’ebé, ami sei haree, depois sei halo diskusaun ho Primeiru-Ministru, Taur Matan Ruak,” Governante ne’e dehan.

Bainhira mak MAPKOMS iha planu atu aprezenta relatóriu estabelese Institutu Formasaun ba Jornalista ne’e ba Konsellu Ministru (KM), nia hatán, bainhira atu aprezenta relátoriu ne’e ba Konsellu Ministru (KM) mak dahuluk tenke hasoru Primeiru-Ministru hodi diskute no rona Xefe Governu nia hanoin, hafoin lori ba aprezenta iha Konsellu Ministru.

“Ita atu aprezenta ba Konsellu Ministru, dahuluk tenke ko’alia uluk ho Primeiru-Ministru, sei haree opiniaun hosi Primeiru-Ministru, depois ita kaer hodi haree atu lori ba Konsellu Ministru,” nia hateten.

Jornalista : Nelia Fernandes

Editór      : Cancio Ximenes