HNGV selebra “World Patient Safety Day” ho konsulta matan gratuita
DILI, 17 setembru 2022 (TATOLI)—Hospitál Nasionál Guido Valadares (HNGV), sábadu ne’e, selebra loron mundiál pasiente seguru ka World Patient Safety Day (WPSD) ho tema “Medikamentu Seguru ho Responsabilidade ba Ema ida-idak nia an” ne’ebé mundu selebra kada 17 setembru iha kada tinan.
Diretora Servisu Apoiu Diagnostiku Therapeutiku iha Hospitál Nasionál Guido Valadares (HNGV), Mingota da Costa Herculano, hateten iha selebrasaun Hospitál Nasionál Guido Valadares (HNGV) hala’o atividade la’o-ain hosi igreja Motael to’o Jardim Prezidente da Repúblika BJ Habibie, hodi kontinua hala’o konsulta matan gratuita nomós halo doasaun raan.
“Ohin loron ida-ne’e mundu tomak selebra loron mundiál pasiente seguru la’ós atu kontente hamansa no exersísiu de’it maibé ho loron ida-ne’e tau mós ita-nia hanoin oinsá. Ita bele tau konsiderasaun aas hodi uza medikamentu loos tantu ita-nia pesoál saúde tomak nomós ba ita-nia komunidade atu iha responsabilidade hodi uza medikamentu ho loloos,” Mingota da Costa Herculano hateten iha nia dirkursu ba loron mundiál pasiente seguru iha Jardim Prezidente da Repúblika BJ Habibie Bidau Santana,
Iha selebrasaun ida-ne’e hamutuk hodi tau aas medikamentu loloos no uza medikamentu mós ho responsabilidada ba ida-idak nia an.
“Atu uza aimoruk tenke ho rajionál tanba oras ne’e daudaun mundu sei luta hela kontra rezisténsia ba antibiotiku rezisténsia ba ai-moruk sira tenke aprende didi’ak, tenke iha koñesimentu ne’ebé mak di’ak liu-liu ba ai-moruk sira. Tanba ikus ne’e ita uza ai-moruk ne’ebé mak ladún loos no nia impaktu la’ós agora kedas maibé iha future maks ei mosu,” Mingota da Costa Herculano informa.
Ezemplu, nia dehan, iha populasaun balun isin-manas ka inus-been loron ida ka rua diretamente ba sosa ai-moruk Amoxilin iha farmásia privada sira sein iha reseita hosi mérdiku sira, entaun ida-ne’e problema ba ema-nia saúde atu hetan rezisténsia.
“Tanba ne’e agradese ba Ministériu Saúde no Organizasaun Mundiál Saúde no parseiru tomak ne’ebé apoiu Hospitál Nasionál Guido Valadares (HNGV) atu hala’o kna’ar di’ak iha futuru mai,” nia esplika.
Jornalista : Felicidade Ximenes
Editór : Cancio Ximenes
