COVALIMA, 19 setembru 2022 (TATOLI)–Administrasaun Munisípiu Covalima (AMC) liuhosi Dirasaun Apoiu Organizasaun Naun Governamentál (ONG) iha Covalima la apoiu fundu ba Organizasaun Naun Governametál lokál ne’ebé estabelese iha munisípiu Covalima.
“Agora ita seidauk fó apoiu orsamentu ba ONG maibé ha’u fó de’it hanoin atu sira bele submete proposta ba iha gabinete Primeiru-Ministru ne’ebé apoiu sosiedade sivil hodi prepara orsamentu ba sosiedade sivil sira, tanba orsamentu la aloka mai iha munisípiu maibé osan sira-ne’e para de’it iha nasional,” Diretór Apoiu Organizasaun Noun Governamentál Covalima, Agostinho Mendonça “Raan Nakali”, hateten ba Agência Tatoli, iha salaun administrasaun munisípiu Covalima, Sukaer Laran, segunda ne’e.
Maske Orsamentu Jerál Estadu tinan fiskál 2021 diretór rasik haruka proposta hodi prevee orsamentu $400,000.00 atu fó apoiu ba ONG lokál iha Covalima iha tinan fiskál 2022, maibé orsamentu ne’e la aprova.
“Iha tinan fiskal 2021 ha’u rasik haruka proposta hodi prevee orsamentu $400,000.00 prepara atu apoiu sira-nia servisu tomak ba ONG lokal iha Covalima hamutuk 20-resin no ONG Internasionál lima (5) iha tinan fiskal 2022 , maibé orsamentu la aprova,” nia informa.
AMC la apoiu orsamentu ba ONG lokal ne’ebé estabelese iha munisípiu Covalima maibé AMC kontinua halibur sira hodi kontrola sira-nia programa ne’ebé implementa iha munisípiu Covalima.
Bazea ba monitorizasaun ONG lokal implementa programa foku liu ba setór agrikultura no ONG internasionál sira implementa programa foku liu ba setór saúde liu-liu haree liu ba prevensaun moras COVID-19.
“Ha’u halibur no husu sira-nia atividade tomak no la’o oinsá, ha’u avalia bainhira sira hala’o sira-nia planu no projetu sira-ne’e iha disputa ruma, ha’u prontu atu fasilita no apoiu sira,” nia hateten.
Tuir bazea dadus, ONG lokál ne’ebé eziste iha Covalima hamutuk 20-resin no ONG Internasional 5 ne’ebé implementa sira-nia programa iha munisípiu Covalima.
Jornalista : Celestina Teles
Editór : Cancio Ximenes
