DILI, POLÍTIKA

Deputadu Mandati prefere la presiza iha eskolta ba membru Governu

Deputadu Mandati prefere la presiza iha eskolta ba membru Governu

Membru PN husi Bankada FRETILIN no membru Komisaun B, David Dias Ximenes "Mandati". Imajen/ António Gonçalves.

DILI, 19 setembru 2022 (TATOLI)—Deputadu Bankada FRETILIN iha Parlamentu Nasionál, David Dias Ximenes ‘Mandati’, prefere agora daudaun Timor-Leste iha ambiente pás, nune’e la presiza iha eskolta ka Corpo Seguransa Pessoál (CSP) ba membru Governu sira.

“Buat ida eskolta sira-ne’e, agora ita-nia rai está em pás laiha buat ida. Buat ida eskolta sira-ne’e bele karik formalidade só ba ema sira titulár órgaun soberania hanesan Prezidente Repúblika, Prezidente Parlamentu Nasionál, Primeiru-Ministru, Prezidente Tribunál Rekursu ne’e formalmente bele hetan eskolta labele ministru sira hotu,” Deputadu David Dias Ximenes “Mandati” hato’o iha reuniaun plenária Parlamentu Nasionál, segunda ne’e.

Tuir nia, se membru Governu sira iha hotu eskolta ne’ebé atu halo despeza tanba tenke iha karreta ida-ne’ebé manutensaun ho tan kombustivel.

“Depois no mínimo três pessoas eskolta ida tama, ida deskansa, ida prontu kualkér eventualidade ne’e mós despeza. Sá funu ida mak atu tama fali iha ne’e. Ita mak as vezes ita la’o hotu ladi’ak, eskolta sira-nia sira ne’e mak tuir ita hanesan dalaruma ita konfunde ambulánsia ka karreta funeráriu,” nia hateten.

Deputadu hosi komisaun B trata asuntu Negósiu Estranjeiru, Defeza no Seguransa ne’e dehan, kombustível agora folin sa’e maka’as.

“Karik bele husu Ministru Asuntu Parlamentár no Komunikasaun Sosiál (MAPKOMS), Francisco Jerónimo, haree took nivel nasionál no internasionál oinsa ita-nia konbustivel agora makaas loos,” nia sujere.

Iha reuniaun plenária, Ministru Asuntu Parlamentár no Komunikasaun Sosiál (MAPKOMS), Francisco Jerónimo, rejista hela sujestasaun hosi Deputadu David Dias Ximenes Mandati nian ne’e.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!