HEADLINE, JUSTISA

MJ-PNTL sei hapara atividade konstrusaun iha rai Estadu área Marconi

MJ-PNTL sei hapara atividade konstrusaun iha rai Estadu área Marconi

Ministru Justisa, Tiago Amaral Sarmento. Imajen Tatoli/Francisco Sony

DILI, 19 setembru 2022 (TATOLI)— Ministériu Justisa (MJ), submete ona despaisu ba Polisia Nasionál Timor-Leste (PNTL), atu hapara atividade konstrusaun hosi sidadaun balun iha rai Estadu área Marconi ka Klínika 333 nia-oin, suku Fatuhada, tanba konsidera fatin ne’e nu’udár propriedade Estadu.

Ministru Justisa (MJ), Tiago Amarál Sarmento, hahú konvoka reuniaun koordenasaun ho Ministeriu Públiku (MP) no Polisia Nasionál Timor-Leste (PNTL), atu halo atuasaun ba sidadun balun ne’ebé halo konstrusaun iha rai Estadu área klínika 333 nia-oin, ka aldeia 04 Marconi, Suku Fatuhada.

Ministériu Justisa halo despaisu hapara atividade konstrusaun iha rai Estadu área Marconi ne’e ho baze ba relatóriu hosi Gabinete Inspensaun Auditoriál (GIA) katak rai iha Klínika 333 nia oin ne’e propriedade Estadu no empreza balun mak arrenda, maibé la selu arrendamentu.

“Nune’e, iha tempu badak, MJ foti desizaun imediata no sei koordena ho Ministériu Públiku no Polisia Nasionál Timor-Leste (PNTL), atu hapara atividade konstrusaun iha ne’ebá tanba ne’e rai Estadu,” Ministru Justisa, Tiago Sarmento, hateten hafoin hala’o enkontru ho komunidade Markoni no Rede ba Rai, iha edifisu MJ, Segunda ne’e.

Tanba estatutu rai iha área Marconi ne’e pretense ba rai Estadu tanba ne’e iha manadatu Sekretáriu Terra Propriadade Jaime Xavier halo kontratu arrendamentu ho kompañia ida atu uza rai Marconi ba fatin negósiu hahú tinan 2017 to’o 2022.

Nune’e, kontratu arrendamentu ne’ebé kompañia selebra ho governu ramata ona fulan-maiu 2022 no seidauk iha renovasaun kontratu ba fatin ne’eba.

“Empreza selu arrendamentu fulan tolu de’it restu nia la selu hodi hamosu divida rihun $36-resin.

Ministru Justisa mós sei hatama partisipasaun ba Ministériu Públiku ba arrendatáriu hirak ne’ebé la kumpre dever, inklui terrenu ne’ebé sai polemika dadaun iha Marconi ne’e,” Ministru informa.

Tanba ne’e, Governante ne’e dehan ema balun ne’ebé hala’o atividade iha ne’eba laiha koñesimentu husi MJ, nune’e halo notifikasaun ba individu ne’ebé atu okupa rai Marconi atu sai nonok ho di’ak. Se notifikasaun dahuluk ne’e maka parte sira la kumpre, ne’e hatudu prova momoos katak, ema sira ne’e hamosu ona aktu seluk.

“Ema neebé daudaun utiliza rai Klínika 333 nia oin atu atensaun tanba aktu ne’ebé hala’o iha indikasaun forte la obedese normas sira neebé maka vigora iha Timor-Leste,” Governante ne’e lamenta.

Ministru Tiago mós promote kontinua buka tuir funsionáriu balun iha MJ, ne’ebé deskonfia fasilita dokumentu ba empreza ne’e.

“To’o ohin loron seidauk iha atribuisaun sertifikadu ruma ba ema ruma, rai Estadu sei la atribui ba ema privadu, Estadu mak bele halo kontratu arrendamenntu ho ema privadu no partikular ne’e iha,” katak.

Daudaun, MJ laiha koñesimentu ba sidadaun estrajeiru ne’ebé halo atividade konstrusaun iha rai Marconi ne’e no laiha koñesimentu hosi Trade Investe, tanba halo fali kontratu arrendamentu partikular ho ema privadu, ne’ebé laiha sertifikadaun na’in-ba rai “hak milik” hanesan baze legól mós laiha.

Iha fatin hanesan, Koordenadór Nasionál Rede ba Rai, Pedrito Viera, hateten hahú akompaña kompaña balun ne’ebé obriga-aan atu halo konstrusaun iha fatin refere, nune’e komunidade balun halo aprezentasaun keixa mai. Nune’e rede ba rai apoiu ba komunidade nia interese tanba fatin ne’e públiku no estatutu husi rai ne’e rasik hanesan Estadu nian.

“Ministériu Justisa hatun ona despaisu hahú inisiu sira halo konstrusaun harii lutu ne’e, maibé sei kontinua no ami prontu apoia Estadu no komunidade sira liga ba aktu sira ne’ebé maka ema hatudu ladun di’ak liuliu la kumpre regra Estadu ida ne’e nian,” katak.

Disputa rai iha Marconi ho metru 50 hosi tasi ibun ne’e, tuir lei ne’e rai Estadu nian, ho ida ne’e laiha razaun ema ida atu hada’u katak ne’e rai privadu.

“Tanba ne’e rede ba Rai nafatin prontu atu servisu hamutuk ho Estadu hodi kombate no defende dignidade Estadu ida ne’e nian,” nia afirma.

Jornalista: Natalino Costa

Editór       : Florencio Miranda Ximenes  

iklan
iklan

Leave a Reply

iklan
error: Content is protected !!