OÉ-CUSSE, 19 setembru 2022 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, segunda ne’e halo inaugurasaun ba projetu klínika ba moras Tuberculoze (TBC) iha suku Nípani, sub-rejiaun Pante Makasar.
“Ohin, ita halo istória ida, RAEOA aumenta tán fasilidade ida importante ba povu Oé-Cusse, tinan barak komunidade konsulta konsentra hotu iha ospitál referál, tán ne’e autoridade hanoin ladún di’ak, tenke harii ketak klínika ba moras TBC nian, atu evita transmisaun,” Arsénio Bano ko’alia iha serimónia inaugurasaun.
Nia enkoraja komunidade no autoridade lokál sira atu kuida fatin ne’e, atu labele hetan estragu, tanba autoridade hakarak hakbesik atendimentu públiku iha baze no prepara fatin ba komunidade hodi bele konsulta ho dignu.
Sekretáriu Rejionál ba Asuntu Saúde, Manuel da Costa informa, fasilidade ne’e iha futuru sai izolamentu tanba durante ne’e pasiente moras TBC, laiha fatin própriu hodi halo kontrolu, nune’e iha futuru pasiente sira-ne’ebé afeta TBC fasil hetan tratamentu di’ak.
“Autoridade kontrui klínika izolamentu ba moras Tuberculoze (TBC) atu separa atendimentu adekuada nune’e bele evita transmisaun hada’et iha sosiedade, no objetivu hosi fasilidade ne’e atu fó garantia ba atendimentu saúde iha RAEOA tanba futuru Hospitál Referensia Oé-Cusse, sei sai alternativa ida hodi fó satizfasaun ba komunidade no sosiedade” nia akresenta.
Nune’e mós Autoridade nia intensaun, iha futuru pesoál saúde sira bele fó tratamentu adekuada ba komunidade, ne’ebé sofre moras TBC, nune’e bele asegura tratamentu no akompañamentu, ho fasilidade adekuadu, nune’e bele senti konfortável no rekupera hosi situasaun ne’e.
Tuir nia, RAEOA tinan barak ona halo konsultasaun ba pasiente moras TBC, iha sala izolamentu Hospitál Referénsia Oé-Cusse, tanba ne’e moras ne’e bele hada’et, entaun autoridade deside separa fatin ida, nune’e bele hetan tratamentu ketak ida hodi evita transmisaun ba pasiente seluk.
Xefe suku Nipani, Pedro Seu Neno Eko, agradese ba autoridade RAEOA harii fasilidade saúde iha komunidade nia leet, nune’e bele fasilita komunidade sira.
“Ha’u reprezenta komunidade suku Nipani naran, hakarak agradese ba Autoridade RAEOA, tanba tinan ne’e harii fasilidade ne’e iha ami-nia suku, ha’u orgullu tanba futuru komunidade sei la la’o dook ona atu konsulta,” autoridade lokál ne’e orgullu.
Entretantu, projetu klínika izolamentu ba TBC ne’e ezekuta hosi empreza Tafen Kuan Unipesoál Lda, ho valór kontratu $154,551.69 autoridade RAEOA aloka hosi Orsamentu Jerál Estadu (OJE) 2021 hodi finansia fasilidade sira iha obra ne’e mak hanesan rezidénsia ba pesoál saúde nian, sala izolamentu ba pasiente TBC hamutuk sala-sia (9).
Nune’e mós sala ba atendimentu, sala laboratóriu no sala ba farmásia inklui saneamentu ijiene kompleta ho moru.
Jornalista: Abílio Elo Nini
Editór: Evaristo Soares Martins
