iklan

EKONOMIA, HEADLINE, INKLUZAUN SOSIÁL, MUNISÍPIU, OÉ-CUSSE (RAEOA)

Projetu merkadu tradisionál iha Baoknana atinje 90%

Projetu merkadu tradisionál iha Baoknana atinje 90%

Konstrusaun merkadu tradisionál Baoknana. Imajen espesiál

OÉ-CUSSE, 19 setembru 2022 (TATOLI) – Konstrusaun merkadu tradisionál Baoknana ne’ebé lokaliza iha aldeia Citrana, suku Bene-Ufe, sub-rejiaun Nítibe, daudaun ne’e progresu fíziku atinje ona 90%.

“Projetu ne’e nia progresu hela 10%, agora nia serbisu fíziku kuaze remata ona atinje 90% ona, hela de’it serbisu ki’ik balu hanesan instalasaun fasilidade ba postu sanitária,” Sekretáriu Rejionál ba Asuntu Komérsiu no Indústria, Pedro da Silva Boquifai, ko’alia iha Oé-Cusse, segunda ne’e.

Pedro da Silva informa, konstrusaun merkadu tradisonál ne’e, autoridade RAEOA hatuur fatuk dahuluk iha dezembru 2021, no tuir kontratu empreza tenke termina obra ne’e iha fulan-abríl 2021.

Tanba konstrusaun ne’e konstrui ho pakote ida, hanesan uma ba merkadu ho nia medida 12×8, hariis-fatin públiku ida (1), postu seguransa no fatin soe lixu unidade-rua (2) nune’e bele fasilita komunidade sira fila-liman ho dignu, maibé atraza uitoan tanba tarde iha mobilizasaun materiál.

Entaun autoridade deside estende nia kontratu nune’e kontrusaun ne’e bele kompleta ba 100%, tanba merkadu ne’e estratéjia atu akumula negosiante sira iha sub-rejiaun Nítibe hala’o atividade komersiál.

“Projetu kleur ona, tanba iha-ne’ebá kondisaun dalan kuandu tempu udan rai tahu susar atu transporte asesu to’o ne’ebá, entaun projetu hahú hafoin udan-been menus, depois maioria materiál empreza mobiliza hosi Dili no dalaruma transporte marítima problema, tán ne’e mak afeta ba konstrusaun ne’e atraza,” nia afirma.

Nia fó-sai katak, tuir planu sei halo inaugurasaun iha outubru, hafoin Prezidente Autoridade RAEOA fila hosi vizita ró Haksolok iha Portugál.

Entretantu, projetu ne’e ezekuta hosi empreza Neno Unipesoál, Lda, ho valór kontratu $57,727.00 ne’ebé aloka hosi Orsamentu Jerál Estadu (OJE) 2021.

Maibé montante orsamentu ne’ebé Agência Tatoli asesu liuhosi livru 3-C (RAEOA-ZEESM) mensiona katak, orsamentu Jerál Estadu (OJE) 2021 ba RAEOA iha tinan fiskál 2021 ho montante $127,000.000.

Hosi montante ne’e koloka $30,000.00 ba konstrusaun merkadu Baoknana (Detailed and Evaluation of Bids for Improvement of Baoknana Market), no projetu ne’e tama iha planu asaun anuál RAEOA nian.

Jornalista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!