iklan

HEADLINE, SAÚDE

Austrália kontinua apoia MS reforsa sistema saúde primaria iha Dili

Austrália kontinua apoia MS reforsa sistema saúde primaria iha Dili

Ekipa Ministériu Saúde ho Patrnership For Development (PHD), foto hamutuk iha semináriu iha diagnostika partisipativu ba dezenvolvimentu planu mikor integradu ba kuidadu saúde primaria. Imajen/Felicidade Ximenes.

DILI, 20 setembru 2022 (TATOLI)— Governu Austrália liuhosi Patnership For Development (PHD), kontinua hatudu kompromisu hodi apoia Ministériu Saúde (MS), atu reforsa ka mellora sistema saúde primária iha Munisípiu Dili.

Ho kompromisu ne’e, ekipa Ministériu Saúde hamutuk ho PHD, tersa ne’e, hala’o semináriu diagnostíku partisipativu ba dezenvolvimentu planu mikro integradu ba kuidadu saúde primária iha munisípiu Dili.

Biban ne’e, Diretora Jerál Prestasaun Saúde iha Ministériu Saúde, Odete da Silva Viegas, hateten semináriu ne’e importante atubele haforsa Sistema Nasonál Saúde, liuliu sistema saúde primária.

“Apoia hosi Governu Austrália liuliu PHD ne’e espera katak ita bele uza másimu liuhusi planu meloramentu mikro iha munisípiu Dili, liuliu prepara lojístika no mós orsamentu tanba dala barak ita enfrenta problema hirak ne’e,” Diretora Jerál Prestasaun Saúde ne’e informa iha City8-Manleuana Dili, tersa ne’e.

Tuir relatóriu peskiza pilotu iha munisípiu Dili, Ermera no Rejiaun Adminitrsativu Espesiál Oé-Cusse (RAEOA) katak hahú hosi tinan 2000 to’o ohin enfrenta problema lojistika no orsamentu, nune’e tenke prepara halo planu meloramentu ba servisu sira  tuir mai.

“Tanba hosi tinan 2000 mai to’o agora buat balun ne’ebé mak ita halo no buat balun ne’ebé mak ita presiza hadi’a,” nia afirma.

Planu estratéjiku setór saúde 2011 to’o 2030, rasik inkorpora ona abordajen integradu, liuliu atu haree ba prestasaun servisu ne’ebé mak integradu inklusiivu no kualidade. Tanba ne’e komitmentu Governu nian liuliu profisionál saúde sira tenke lori hakbesik liután prestasaun saúde ne’e ba komunidade sira.

Iha fatin biban hanesan, Diretora Programa PHD, Armandina Gusmão Amaral, informa, hosi servisu pilotu Dili, Ermera, RAOEA refleta atinjimentu iha setór saúde nian durante tinan 20 hatudu ona meloramentu balun ba populasaun nia saúde, iha progresu di’ak, iha dezenvolvimentu polítika estratéjia nomós lideransa iha Ministériu Saúde.

“Presiza refleta progresu denzentralizasaun importante tebes ba sistema saúde, liuliu iha fasilidade saúde hanesan sentru saúde no postu saúde komuniatria ne’ebé nia papel importante atu koordena no fornese asisténsia saúde ba komunidade sira,” nia afirma.

Jornalista: Felicidade Ximenes

Editór      : Florencio Miranda Ximenes

iklan
iklan

Leave a Reply

iklan
error: Content is protected !!