HEADLINE, KAPITÁL, NASIONÁL

Edifísiu CASMTL ho kondisaun lapermite asegura obra jornalístiku Max Stahl

Edifísiu CASMTL ho kondisaun lapermite asegura obra jornalístiku Max Stahl

Espoza Max Stahl, ingrid Bucens. Imajen TATOLI/Anito Soares

DILI, 20 setembru 2022 (TATOLI)–Espoza saudozu Max Stahl, Ingrid Bucens, husu ba Governu liuhosi Primeiru-Ministru (PM), Taur Matan Ruak, atu asegura obra jornalístiku Max Stahl nian tanba daudaun kondisaun ba edifísiu Sentru Audivizuál Max Stahl Timor-Leste (CASMTL, sigla portugés) lapermite ona atu rai obra hirak ne’e.

“Ami informa ba Primeiru-Ministru, karik iha fatin foun ba ami tanba fatin daudaun ho kondisaun ladi’ak ona. Ida-ne’e fó perigu ba obra sira no ekipamentu sira iha fatin ne’e, hanesan udan-been tama,” Ingrid Bucens hato’o preokupasaun ne’e bainhira hasoru malu ho Primeiru-Ministru iha Rezidénsia Farol, tersa ne’e.

Notísia relevante: Espoza Max Stahl husu Governu transforma CAMSTL sai institutu públiku

Biban ne’e, Ingrid husu Governu atu toma atensaun urjentemente ba difikuldade ne’ebé CASMTL hasoru, nune’e obra hirak ne’e labele estraga no solusaun dahuluk mak asegura lalais obra sira ne’e ba fatin provizóriu hafoin buka fatin permanente.

Jornalista no Realizadór, Cristopher Wenner ho naran koñesidu Max Stahl, hakotu iis iha loron 28 outubru 2021, iha Brisbane, Austrália.

Saudozu hanesan autór ba filmajen Masakre Santa Cruz ne’ebé akontese iha loron 12 novembru 1991, ne’ebé masakre ne’e akontese tanba antes ne’e Militár indonéziu asalta Igreja Motael iha loron 28 outubru 1991, ne’ebé ikus mai tiru mate juventude loriku asswa’in, Sebastião Gomes.

Max Stahl moris iha Reinu Unidu, iha loron 06 dezembru 1954, ne’ebé ninia loron mate iha tinan 30 loron mate Saudozu Sebastião Gomes.

Max Stahl estabelese ona CAMSTL ho objetivu atu prezerva no divulga kolesaun audiovizuál ne’ebé dokumenta períodu rezisténsia, durante akontesimentu sira no hafoin referendu no tinan dahuluk independénsia to’o ba loron ohin.

Iha tinan 2013, United Nations Educational, Scientific and Cultural Organization (UNESCO) rekoñese ona kolesaun ne’e no ba rai iha Rejistu Memória ba Mundu, kria ona programa ho objetivu atu proteje no promove patrimóniu dokumentál mundiál liuhosi konservasaun no asesu ba dokumentu sira.

Jornalista   : Antónia Gusmão

Editora       : Julia Chatarina

iklan
iklan

Leave a Reply

iklan
error: Content is protected !!