iklan

EKONOMIA, HEADLINE

Empreza hosi Singapura hakarak investe iha setór aéreu

Empreza hosi Singapura hakarak investe iha setór aéreu

Aeroportu Internasionál Prezidente Nicolau Lobato, Comoro, Dili. Imajen/espesiál

DILI, 20 setembru 2022 (TATOLI)–Delegasaun hosi empreza Asia Cargo Network hosi Singapura, tersa ne’e, hasoru malu ho Primeiru-Ministru (PM), Taur Matan Ruak, hodi halo aprezentasaun ida ligadu ho planu investimentu iha setór aéreu iha Timor-Leste.

“Ami hasoru malu ho Primeiru-Ministru hodi aprezenta planu investimentu ho objetivu atu harii empreza airline ida ho bandeira Timor-Leste iha tempu badak. Voo ne’e doméstiku no kontinua rute Dili-Darwin no Dili-Bali, Dili-Singapura no Dili-Kupang, sei loke mós ba rute ba nasaun sira ne’ebé mak iha ona Air Service Agreement (ASA),” Diretór Ezekutivu empreza Asia Cargo Network, Iman Marco, hateten hafoin halo aprezentasaun ba Xefe Governu, iha Rezidénsia Farol.

Notísia relevante: PN aprova akordu servisu aéreu Timor-Leste ho Emiradu Árabe Unidu

Nia dehan, bainhira buat hotu la’o di’ak no prienxe rekezitu hotu ne’ebé estabelese hosi Autoridade Aviasaun Sivil Timor-Leste (AACTL, sigla portugés) maka fevereiru ka marsu 2023 halo ona lansamentu ba voo ne’e rasik.

“Objetivu importante maka hakarak Timor-Leste tenke iha rasik aviaun ida, ne’ebé ho tipu Boing 737 800NZ sei mai hosi Amérika. Primeiru-Ministru apoia tebes no husu atubele aselera planu, no iha esperansa ba planu ne’e rasik. Nia kontente tanba Timor-Leste presiza iha investimentu hanesan aéreu nian nune’e bele halo konetividade hosi Timor-Leste ba nasaun seluk,” nia esplika.

Investidor hosi Singapura ne’e antes ne’e investe ona iha nasaun tolu no kobre Ázia pasífiku tomak iha área aéreu.

Planu investimentu ne’e ho previzaun sei emprega traballadór timor-oan 99% no parte administrasaun sei responsabiliza hosi entidade investidór.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!