DILI, 20 setembru 2022 (TATOLI)— Ministériu Saúde (MS) liuhosi Programa Saúde na Família, hahú hosi fulan-janeiru to’o juñu, resjista inan isin-rua na’in-12 mak mate iha fasilidade saúde iha territóriu nasionál.
“Hosi janeiru to’o juñu inan isin-rua ne’ebé mai iha fasilidade saúde atu partu, maibé hetan komplikasaun nai’in-609, husi númeru ne’e na’in 12 mak mate iha territóriu nasionál tanba maioria raan fakar no prosesu kle’ur atu partu,” Diretór Saúde na Familia iha Ministériu Saúde,Vitór Soares, hateten iha City8 Manleuana, tersa ne’e.
“Inan sira ne’ebé mate ne’e maioria inan isin-rua ho idade menus 20, entaun sira laiha koñesimentu kona-bá prosesu saúde reprodutivu no mós ida seluk mak inan sira seidauk iha preparasaun atu sai inan ba bebé,” nia afirma.
Tuir padraun hosi Organizasaun Mundiál Saúde ne’ebé Ministériu Saúde adopta katak feto ho idade menus 20 seidauk bele sai inan ka kaben sedu, maibé iha tereñu hatudu katak idade minoridade mak isin-rua iha Timor-Leste.
“Saida mak ita tenke halo mak Ministériu saúde nafatin fó informasaun liuhusi sentru saúde, postu saúde, ospitál referál kona-ba kuidadu isin-rua no preparasaun sira nian ba etapa sira tuir mai,” katak nian.
Atu prevene inan isin-rua mate, nia dehan Ministériu Saúde hahú estabelese ona maternal auditória atu halo investigasaun ba motivu inan isin-rua ne’ebé raan fakar no prosesu kle’ur iha partu.
“Departmentu Infantil ne’ebé estabelese iha nivél munisipál no sentru saúde sira para bainhira inan ka bebé mate ne’ebé akontese iha fasilidade saúde nomos iha komunidade nia uma sira tenke investiga kauza husi mate rasik ne’e tanba saida,” nia afirma.
“Exemplu hanesan inan ne’e mate tanba raan fakar tanba ita menus ekipamentu iha fasilidade saúde ka oinsá ita tenke hatene no tau atensaun atu ba oin evita kazu sira komplikasaun ba inan sira atu partu,” na hatutan.
Jornalista : Felicidade Ximenes
Editór : Florencio Miranda Ximenes
