iklan

EKONOMIA, HEADLINE, MUNISÍPIU, OÉ-CUSSE (RAEOA)

JICA konsulta Autoridade RAEOA kona-bá futuru instalasaun portu

JICA konsulta Autoridade RAEOA kona-bá futuru instalasaun portu

JICA konsulta Autoridade ba futuru instalasaun portu ida iha RAEOA. Imajen mídia ZEESM.

OÉ-CUSSE, 20 setembru 2022 (TATOLI) – Japan International Cooperation Agency (JICA), segunda ne’e, realiza enkontru ho Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano,  konsulta kona-bá Projetu Estratéjia Port Development Master Plan nian, nune’e iha futuru bele konstrui portu ida iha rejiaun ne’e.

Direitór infraestrutura ba asuntu aportil hosi JICA, Constâncio Freitas, informa, objetivu viajen iha RAEOA atu konsulta Projetu Estratéjia Port Development Master Plan iha Timor-Leste, tanba iha semana hirak liubá JICA konklui ona nia site visite iha territóriu Timor laran tomak no Oé-Cusse hanesan oportunidade ikus.

“Intensaun hosi enkontru kortéjia ho Prezidente Autoridade RAEOA, nia prinsipál atu mai buka hatene kona-bá planu ZEESM nian, liuliu kona-bá futuramente planu atu konstrui tán portu iha Oé-Cusse, no mós parte JICA hakarak atualiza informasaun kona-bá prosesu ró Haksolok nia progresu, nomoos hato’o pergunta balu kona-bá planu ZEESM iha ka lae, atu investe iha Oé-Cusse, ne’ebé informasaun esensiál sira ohin hato’o ba Prezidente responde ona,” Constâncio Freitas ko’alia iha Oé-Cusse, segunda ne’e.

Nia informa, estratéjia Port Development Master Plan, implementa iha Timor-Leste nia durasaun tinan rua, ho objetivu prinsipál tolu, dahuluk atu halo asesmentu ba kondisaun portu atuál iha territóriu Timor, hanesan plant, no mós sei hili portu ne’ebé mak sai prioridade, hanesan iha Atauru tama ona prioridade dahuluk.

Objetivu daruak, JICA sei kontinua identifika prioridade tuir mai, liuliu parte súl, tanba iha parte súl seidauk iha fasilidade ba infraestrutura portuáriu, no objetivu ikus maka sei halo planu asaun ba ezekusaun projetu.

Diretór Diresaun Rejionál Infraestrutura (DRI) RAEOA, Candido dos Reis Amaral, hatete, ekipa JICA identifika ona fatin própriu sira iha tasi ibun, nune’e iha futuru bele instala portu ida iha rejiaun ne’e.

“Horisehik, ha’u simu orientasaun hosi Prezidente Autoridade simu ekipa hodi JICA, sira mai halo estudu ida iha futuru atu instala tán portu ida iha Oé-Cusse, entaun ha’u lori sira ba identifika no haree fatin sira hotu liuliu iha tasi ninin sira,” nia katak.

Jornalista: Abílio Elo nini
Editór: Evaristo Soares Martins

iklan
iklan

Leave a Reply

iklan
error: Content is protected !!