iklan

HEADLINE, MUNISÍPIU, VIQUEQUE

KHC entrega konservasaun bee-matan ba abitante aldeia Bahafou Viqueque

KHC entrega konservasaun bee-matan ba abitante aldeia Bahafou Viqueque

Bee-matan iha aldeia Bahafou Viqueque, tersa (20/09). Imajen Tatoli/Vitorino Lopes da Costa

VIQUEQUE, 20 setembru 2022 (TATOLI)–Fundasaun K’nua Haberan Komunidade (KHC, sigla portugés), tersa ne’e, entrega konservasaun bee-matan ba komunidade iha aldeia Bahafou, suku Uma Quic, postu administrativu Viqueque vila, munisípiu Viqueque.

Tuir Diretór Ezekutivu Fundasaun KHC, Augusto Pinto, fundasaun ne’e serbisu hamutuk ho parseiru Catholic Relief Services (CRS) hodi implementa projetu Hokoren atu halo konservasaun rai no bee-matan hodi komunidade bele asesu bee-moos.

“Konservasaun ne’e serbisu hamutuk ho ita-nia komunidade hodi halo konstrusaun tanke bee-matan hodi halibur bee. Nune’e, ohin ami entrega bee-matan no ekipamentu ba komunidade hodi kontinua halo konservasaun bee ne’ebé daudaun iha hodi sira uza konsumu tempu naruk,” Diretór Ezekutivu hateten hafoin entrega bee-matan no ekipamentu ba komunidade, iha aldeia Bahafou, tersa ne’e.

Aleinde ne’e, KHC munisípiu Viqueque implementa atividade konservasaun ba estrutura rai no bee-moos iha suku Uma Quic, postu Viqueque vila, munisípiu Viqueque no rezultadu hosi konservasaun ne’e maka komunidade aldeia Bahafou hahú asesu ona bee-moos, tanba durante tinan barak komunidade la asesu.

Notísia relevante: Ema deskoñesidu taka bee-matan iha Luihunu Viqueque

Nune’e, nia husu ba komunidade Bahafou atu kontinua kuidadu bee-matan no konserva nafatin ai-horis atu bee ne’ebé iha labele maran.

Iha fatin hanesan, Xefe suku Uma Quic, Angelo Miguel da S. Soares, informa, komunidade hosi suku Uma Quic hamutuk aldeia ualu kuaze 50% asesu bee-moos inklui aldeia Bahafou, maibé hosi konservasaun ne’e komunidade Bahafou daudaun ne’e bele asesu ona bee-moos.

“Ha’u agradese ba KHC ho ninia parseiru sira ne’ebé halo ona konservasaun hodi komunidade lokál ne’ebé durante tinan barak la asesu bee-moos bele asesu ona. Durante ne’e ami esforsu hodi hato’o pedidu ba Governu, maibé laiha resposta ruma, ho nune’e komunidade kontinua halerik ba bee-moos,” nia akresenta.

Iha fatin ketak, Xefe aldeia Bahafou, Francisco Pinto, relata, difikuldade ne’ebé tinan barak abitante purvolta 200 enfrenta maka susar asesu bee-moos no komunidade tenke la’o ho distánsia dook hodi ba kuru bee.

“Daudaun komunidade fasil asesu bee-moos hodi konsumu loron-loron. Ha’u sente kontente no agradese tanba bee agora besik ona komunidade hodi komsumu. Durante tinan barak komunidade sira tenke ba kuru iha mota Kararas hafoin sira konsumu. Nune’e, ha’u ho komunidade sei konserva didi’ak bee-matan ida-ne’e hodi konsumu,” nia tenik.

Nune’e mós, abitante Bahafou, Carlos Soares Pinto, hateten, bee-matan ne’e baibain to’o fulan-maiu maran ona maibé bainhira halo ona konservasaun kuda ai-horis maka bainhira tama bailoron agora seidauk maran.

“Ami agradese tebes tanba daudaun bele kuru bee besik ona bee ida-ne’e sufisiente ona ba ami hodi konsumu loron-loron,” nia dehan.

Lia-na’in aldeia Bahafou, Agostino Soares, husu beiala sira oferese bee ba komunidade lokál hodi konsumu tanba durante tinan barak komunidade halerik ba bee.

Iha biban ne’e, KHC apoiu mós ortikultura liuhosi projetu Hakoren hahú jullu 2020 ho durasaun to’o dezembru 2023, ne’ebé apoiu orsamentu ne’e ba konservasaun bee-moos no rai hamutuk $1.000 hodi sosa materiál bee hanesan sanyo, paralon metru 200, tanki bee mili litru 1.200, no ekipamentu agrikultura henesan rega modo, pranet no modo musan.

Serimónia ne’e partisipa hosi reprezentante Administradór munisípiu no komunidade aldeia Bahafou.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!