iklan

HEADLINE, MUNISÍPIU, VIQUEQUE

Ospitál Internamentu Viqueque rejista kazu ISPA hamutuk 8.110 durante fulan-ualu

Ospitál Internamentu Viqueque rejista kazu ISPA hamutuk 8.110 durante fulan-ualu

Ospitál Internamentu Viqueque. Imajen/Vitorino Lopes da Costa

VIQUEQUE, 20 setembru 2022 (TATOLI)—Ospitál Internamentu Viqueque rejista kazu infensaun vias respiratóriu aguda (ISPA) hamutuk 8.110, durante fulan-ualu nia laran.

“Ami rejista kazu moras ho númeru a’as liu mak ISPA hamutuk 8.110 hahú hosi fulan-janeiru to’o agostu. Nune’e mós iha fulan-ualu nian laran, pasiente ne’ebé baixa iha internamentu Viqueque ne’e hamutuk 847. Rejista mós moras sira seluk,” Xefe sentru saúde Viqueque vila, Celestina da Costa Alves, hateten iha Internamentu Viqueque vila, tersa ne’e.

Moras seluk ne’ebé ho rejista ho númeru a’as maka diareia ho totál 2.118, kompostu hosi grupu ho tinan 1 iha 354, tinan 1 to’o 4 iha 582, tinan 5 to’o 14 iha 332, tinan 15 ba leten iha 374.

“Ami rejista mós moras pneumonia iha fulan-ualu ne’e hamutuk 579 no rejista moras scabeis hamutuk 1.257,” nia akresenta.

Notísia relevante: Janeiru to’o juñu, pasiente ISPA númeru aas iha Liquiça

Aleinde ne’e, Internamentu Viqueque rejista moras diareia ho ran ho totál hamutuk 62, kompostu hosi ba grupu tinan 1 iha 1, tinan 1 to’o 4 iha 22, tinan 5 to’o 14 iha 12, tinan 15 ba leten iha 19 no kazu moras malaria iha 9.

Durante fulan-ualu ne’e rejista asidente tráfigu ne’ebé mai halo tratamentu iha Internamentu Viqueque hamutuk 39.

Xefe sentru saúde Viqueque vila dehan, moras ne’ebé rejista ne’e hetan tratatamentu di’ak hosi pesoál saúde sira.

Sentru saúde Viqueqeu vila realiza programa saúde sira hodi komunidade bele prevene-an hosi moras sira.

“Atu prevene moras sira ne’ebé rejista, ami realiza programa saúde iha família, programa siska, programa tuberkolojia no halo promosaun iha fasilidade sira hodi komunidade bele hakbesik-an ba pesoál saúde,” nia hato’o.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!