DILI

SECoop fasilita formasaun kooperativa ba Ema ho Defisiénsia na’in-35

SECoop fasilita formasaun kooperativa ba Ema ho Defisiénsia na’in-35

Membru Asosiasaun Halibur Defisiénsia Matan Timor-Leste (AHDMTL). Imajen Tatoli/osória Marques.

DILI, 20 setembru 2022 (TATOLI)—Sekretáriu Estadu Kooparativa (SECoop) servisu hamutuk ho Asosiasaun Halibur Difisiénsia Matan Timor Leste (AHDMTL) fasilita formasaun kooperativa ba Ema ho Defisiénsia (EhD) hamutuk 35.

“Membru AHDMTL hamutuk 35 mak sei partisipa formasaun kona-ba kooperativa, nune’e husu tenke ativu hodi bele kompreende no hetan benefísiu hosi formasaun refere,” Diretór Ezekutivu AHDMTL, Gabriel de Sousa, hateten iha edifísiu Manleuana, tersa ne’e.

Nia dehan hosi parte SECoop fó sensibilizasaun ba ema ho defisiénsia liu-liu ba membru AHDMTL ba dala rua ona no formasaun ne’e sei hahú ohin to’o iha tersa (20-25/09).

“Ita hatene lala’ok kooperativa ida-ne’e oinsá no kooperativa lori ita ba iha ne’ebé, maibé ita-nia hakarak haree kooperativa ninia benefísiu iha ka lae,” nia hateten.

Diretór ne’e hateten, formasaun kooperativa ne’e sei foku liu ba setór ekonómia atu oinsá mak setór produtivu bele hamoris EhD iha área kooparativa, nune’e membru AHDMTL ne’ebé mak envolve iha organizasaun mak tenke inklina-an iha área kooperativa.

“Ita haree ba rezultadu informasaun hosi Ministériu Solidariedade Sosiál no Inklluzaun (MSSI) katak EhD asesu ba subsídiu karik fulan neen (6) dala ida ho montante rihun $90, hodi bele hala’o ekonómia liuhosi kooperativa,” nia dehan.

Tanba ne’e, ba membru sira katak ida-ne’e oportunidade di’ak tanba tuir lei Konstituisaun RDTL iha artigu 138 (Organizasaun ekonómiku) hateten ‘organizasaun ekonómiku Timór-Leste nian hatuur iha konjugasaun forma komunitária sira ho liberdade ba inisiativa no jestaun emprezariál no nia koezisténsia ho setór públiku, setór privadu no setór kooperativu no sosiál iha soin meiu produsaun nian’ ne’e importante tebes.

Iha fatin hanesan, Diretór Dirasaun Delegasaun Munisipál tutela hosi SECoop, Olderico Lopes hateten, atu estabelese kooperativa ne’e, tinan kotuk halo ona sensibilizasaun ba ema ho defisiénsia sira-ne’evé sai membru ba AHDMTL.

Tanba, tuir nia, bainhira iha ona orsamentu hodi hala’o negósiu liuhosi setór kooperativa mak osan ne’e labele rai de’it tenke halo sirkulasaun hodi bele hetan lukru di’ak.

“Hahú ohin to’o sábadu, ita hasoru malu hodi ko’alia kona-ba kooperativa, tanba kooperativa ne’e atu investe osan hamutuk, labele osan ne’e rai de’it, maibé tenke investe fila-fali hodi halo negósiu atu nune’e kooperativa ne’e bele la’o di’ak,” nia dehan.

Ida-ne’e opurtunidade ne’ebé membru sira tenke uza ho didi’ak, tanba lala’ok kooperativa ne’e la’o di’ak tebes, bainhira membru sira ativu iha diskusaun ho másimu.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!