iklan

NASIONÁL, POLÍTIKA

Selebrasaun loron Nasionál Liberdade Imprensa sei realiza iha Balibo

Selebrasaun loron Nasionál Liberdade Imprensa sei realiza iha Balibo

Konsilleiru Konsellu Imprensa (CI-sigla portugés), Francisco Simões da Costa Belo. Imajen Tatoli/Mídia CI.

DILI, 20 setembru 2022 (TATOLI)–Konselleiru Konsellu Imprensa (CI-sigla portugés), Francisco Simões da Costa Belo, hateten selebrasaun loron nasionál ba liberdade imprensa sei realiza iha Munisípiu Bobonaro, postu adminiatrativu Balibo.

Notísia Relevante: PN aprova 16 outubru sai loron nasionál Liberdade Imprensa

“Ita orgullu tanba ita-nia Parlamentu Nasionál aprova ona loron 16 outubru sai Loron Nasionál Liberdade Imprensa, nune’e ita seiselebra loron nasionál ne’e iha Balibo no na’in ba komemorasaun ne’e mak jornalista, mídia-na’in, ssosiasaun jornalista sira,” FranciscoSimões da Costa Belo hateten bainhira halo abertura ba diskusaun ba lansamentu dahuluk ba loron Nasionál Liberdade Imprensa, iha Golden Star, Audian, Dili, tersa ne’e.

Tanba ne’e, iha enkontru ida-ne’e Conselho de Imprensa (CI) konvida no envolve mídia-na’in inklui xefe redasaun no editór sira, nune’e tau hanoin hamutuk ideia liga ho loron nasionál liberdade imprensa tanba foin primeiravés Parlamentu Nasionál aprova loron ne’e sai loron nasionál.

Nune’e, hahú ohin ba oin sei atribui karta konvite ba instituisaun mídia sira hodi halo preparasaun no envolve iha enkontru tuir mai.

Iha fatin hanesan, Diretór Dirasaun Komunikasaun Sosial, Relasaun Institusional no Kooperasaun (CSRIC, sigla portugés), Altino da Cruz Freitas, hateten,enkontru ne’e buka solusaun hodi realiza atividade komemorasaun loron nasionál liberdade imprensa iha Balibo.

“Objetivu hosi ita-nia enkontru ne’e atu halo planu programa no mós preparasaun servisu ba lansamentu ne’e,” nia dehan.

Iha komemorasaun ne’e mós sei iha planu no programa ne’ebé atu halo mak sei dezloka iha loron 10 outubru hodi halo preparasaun ba atividade iha Balibo.

Iha 13 outubru sei halo abertura ba feira ba produtu lokál, nune’e fó tempu ba komunidade hosi ne’ebá hodi prepara ai-han lokál ba partisipante sira no sei halo debate televizaun no kafé dadeer liuhosi Rádiu Televizaun Timor-Leste (RTTL).

Iha 15 outubru, Conselho de Imprensa (CI) sei konvida xefe redasaun, na’in ba mídia, tanba iha forum editoriál Nasionál ne’e, CI hakarak xefe redasaun sira iha Dili no munisípiu, no jestór Rádiu Komunidade sira hodi ko’alia kona-ba mídia iha Timor-Leste no ho nia obstakulu sira.

Iha biban ne’e, sei atribuisaun prémiu ba jornalista sira liu-liu prémiu lima (5) no aumenta tan prémiu ida kona-ba Max Stahl nian.

Aleinde halo lansamentu ba loron nasionál Liberdade Imprensa iha 16 outubru ne’e, sei komemora trajédia Balibo Five liuhosi misa agradesimentu.

“Lansamentu loron nasionál liberdade imprensa sei halo iha tuku 17h00 maibé sei hein ajenda tuir mai tanba sei iha faze diskusaun,” nia dehan.

Antes ne’e, iha 24 maiu liubá, Parlamentu Nasional (PN) aprova projetu rezolusaun Parlamentu Nasionál númeru 95 / V ( 4a ) -institui loron Nasionál Liberdade Imprensa iha 16 outubru, nune’e kada tinan bele selebra.

Komemorasaun ne’e hodi fó rekuñesimentu ba jornalista estranjeiru sira-ne’ebé mate iha tempu okupasaun Indonézia ne’ebé halo servisu iha órgaun komunikasaun sosiál oioin hodi fó sai kauza Timor-Leste to’o hetan auto determinasaun ka ukun rasik an, no liberdade imprensa ba órgaun komunikasaun sosiál, direitu informasaun livre asegura informasaun ne’ebé hatuur ona iha konstituisaun.

Timor – Leste mós hetan indie liberdade imprensa iha nasaun Sudeste Aziátiku di’akliu garante liberdade imprensa, liberdade espresaun no direitu informasaun, tanba ne’e Parlamentu Nasionál institui 16 outubru kada tinan hodi bele komemora loron nasionál ba Liberdade Imprensa.

PN rekomenda ba Governu, iha 16 outubru kada tinan atu promove asaun kampaña informasaun no sensivilizasaun ba importánsia liberdade imprensa.

Iha lansamentu ne’e, sei partisipa hosi Prezidente Repúblika, José Ramos Horta, Prezidente Parlamentu Nasionál, Sekretáriu Estadu Komunikasaun Sosiál (SEKOMS), Ministériu Asuntu Parlamentar Komunikasaun Sosiál (MAPKOMS), korpu diplomátiku sira, parseiru sira inklui entidade mídia sira.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!