Uma kain 3.645 iha Covalima sei asesu bolsa da mãe jerasaun foun
COVALIMA, 20 setembru 2022 (TATOLI)—Diretór Sentru Solidariedade Sosiál Covalima, Agapito Asis, relata uma kain 3.645 iha Covalima sei asesu subsídiu bolsa da mãe jerasaun foun tinan fiskál 2022.
“Uma kain 3.645 mak sei asesu subsídiu bolsa da mae jerasaun foun. Ita atu halo pagamentu subsídiu bolsa da Mãe tinan fiskal 2022 Centru Solidariedade Sosial seidauk iha informasaun MSSI mak fó sai kalendáriu pagamentu hafoin ami implementa,”Agapito Asis relata dadus ne’e ba jornalista sira, iha nia kna’ar fatin, Suai Loro, tersa ne’e
Kretéria atu asesu ba subsídiu bolsa da mãe jerasaun foun mak família ne’ebè iha oan ho idade mínimu tinan ida no masímu tinan 16 ne’e, estudu iha ensinu báziku to’o sekundáriu submete deklarasaun eskola, kaderneta, atestadu médiku, kartaun eleitorál, sertidaun batizmu inan ho aman, fixa família no billete identidade (BI).
Ho nune’e, nia parte husu ba benefisiariu ne’ebè benefisia ba subsídiu bolsa da mãe jerasaun foun atu hein de’it.
“Prosesu pagamentu ami servisu hamutuk ho Banku Nasionàl Comercio Timor-Leste (BNCTL) bainhira fó sai ona kalendáriu mak banku sei halo pagamentu,” nia informa.
Tanba, tuir nia, polítika Governu haktuir sidadaun ne’ebè asesu ba subsídiu bolsa da mãe jerasaun foun ne’e, tinan ida halo pagamentu dala-ida
Tuir dadus, uma-kain ne’ebè asesu ba subsídiu bolsa da mãe jerasaun foun ne’e hamutuk 3.645 mo hosi númeru ne’e kompostu hosi feto 3.470 no mane 175.
Dadus sira ne’e mai hosi Postu Administrativu sira hanesan postu administrative Fatululik 152, Fatumea 253, Fohorem 193, Maucatar 562, Suai 1.012, Tilomar 435 no postu administrative Zumalai 1.038.
Jornalista : Celestina Teles
Editór : Cancio Ximenes
