iklan

HEADLINE, MUNISÍPIU, VIQUEQUE

Autoridade Viqueque halo abertura jogu tradisionál hetan lisensa hosi MTKI

Autoridade Viqueque halo abertura jogu tradisionál hetan lisensa hosi MTKI

Serimónia abertura jogu tradisionál bola guling, iha aldeia Mamulak, suku Caraubalo, kuarta (21/09). Imajen Tatoli/Vitorino Lopes da Costa

VIQUEQUE, 21 setembru 2022 (TATOLI)--Autoridade Viqueque hamutuk ho Polísia Nasionál Timor-Leste (PNTL), kuarta ne’e, halo abertura jogu tradisionál bola guling hosi empreza Osnara Digma, Unipessoal, Lda, ne’ebé hetan ona lisensa hosi Ministériu Turizmu Komersiu no Indústria (MTKI).

“Atividade ne’e nafatin tenke kolabora ho parte seguransa hodi asegura atividade, maski hetan ona lisensa. Aleinde ne’e, tenke hametin mós esturutura,” Adjuntu Sekretáriu munisípiu Viqueque, José da Costa de Sousa, hateten, iha serimónia abertura jogu tradisionál, iha aldeia Mamulak, suku Caraubalo, kuarta ne’e.

Biban ne’e, Adjuntu agradese ba empreza ne’ebé esforsu-an hodi hetan lisensa hodi realiza jogu tradisionál, ho durasaun lisensa durante tinan-ida, maibé bainhira lisensa mate tenke halo moris fali no kada fulan tenke kumpre dever selu taxa ba Estadu.

Notísia relevante: MTKI prevee $75.000 hodi kria sentru jogu tradisionál

Iha fatin hanesan, Segundu Komadante PNTL munisípiu Viqueque, José Afonso, hateten, jogu tradisionál bola guling mensiona iha dekretu-lei númeru 6/2016/ 20 abril, nune’e jogu ne’e loke iha munisípiu Viqueque maibé tenke iha lisensa hodi selu taxa.

“Bainhira laiha lisensa, Polísia sei hapara atividade jogu sira. Durante ne’e PNTL hala’o ninia knaar hodi hapara jogu tradisionál sira ne’ebé laiha lisensa. Lei la taka dalan ba povu hodi harii kompañia atu hamoris ita-nia ekonomia família maibé ami husu kompañia jogu tradisionál sira tenke implementa tuir dekretu-lei hodi labele hamosu dezintendementu ruma,” nia akresneta.

Nune’e mós, Diretór empreza Osnara Digma, Unipessoal, Lda, Venancio Ciqueir, dehan, antes ne’e hetan ona lisesnsa.

“Durante ne’e ha’u esforsu trata dokumentu besik tinan ida, hafoin ami hetan lisensa hodi realiza jogu ida-ne’e, iha ami-nia lisensa ne’e ho durasaun tinan-ida no bainhira mate bele renova. Ami mós sei kumpre dever kada fulan sei selu taxa ba Governu,” Venancio tenik.

Empreza Osnara Digma, Unipessoal, Lda ho traballadór hamutuk 50, kada fulan sei selu taxa $ 1.500 resin ba Estadu.

Tuir órariu jogu sei loke iha segunda to’o sesta hahú tuku 18:000 lorokraik to’o tuku 01:00 madruga no sábadu-domingu sei hahú tuku 09:00 dadeer, ne’ebé jogu sei realiza iha aldeia Mamulak, suku Caraubalo, postu administrativu Viqueque Villa.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!