Ekipa tekniku re-verifika estrada diresaun postu Laga-Baguia
BAUCAU, 21 setembru 2022 (TATOLI) – Ekipa tékniku Ministériu Obra Públika (MOP) daudaun ne’e hala’o re-verifikasaun ba estrada diresaun postu admistrativu Laga ba postu Baguia, munisípiu Baucau hodi rekolla dadus antes hahú rehabilitasaun hosi kompañia iha tinan-ne’e.
Diretór Obra Públika Munisípiu Baucau, Pedro Alexandre Guterres Pereira, haktuir, tuir planu ekipa tékniku sei finaliza re-verifikasaun dadus iha fulan-outubru hanesan rekolla dadus uma no ai-horis hosi komunidade ne’ebé besik iha estrada atu halo kontajen indemnizasaun antes submete relatóriu finál ba nasionál.
“Prosesu re-verifikasaun mak remata iha fulan-outubru, projetu sei hahú iha fulan-novembru,” Diretór Obra Públika Baucau, informa ba Agência Tatoli iha Vila Nova, kuarta ne’e.
Governu mak responsável ba prosesu indemnizasaun tanba ne’e presiza re-verifikasaun dadus nune’e bainhira obra hahú labele mosu dezintendimentu entre kompañia ho komunidade.
Servisu munisipál obra públika Baucau kontinua akonpaña prosesu refere hanesan informa ba Prezidente Autoridade Munisipál (PAM) atu koordena ho administradór postu Laga no Baguia hodi serbisu hamutuk ho ekipa tékniku sira hodi finaliza re-verifikasaun iha baze.
“Sira koopera ho di’ak, administradór sira no komandante eskuadra PNTL mós akonpaña lori metru no komunidade koopera ho di’ak,” Pedro Perreira akresenta.
Komuinidade postu Laga no Baguia ho entuziasmu hein reabilitasaun estrada refere tanba tinan barak hein governu fó atensaun másimu ba kondisaun estrada postu rua nune’e fasilita transporta produtu ba merkadu.
Tuir dezeñu estrada diresaun Laga to’o postu Baguia purvolta kilómetru 38 ho luan metru neen ne’ebé sei konstrui dreinajen, konstrusaun ponte inklui monta fasilidade estrada hanesan sinál tránzitu ne’ebé rezultadu aprovizionamentu kompañia internasionál sai manán-na’in ho tipu reabilitasaun ho durasaun kontratu tinan-ida.
Jornalista : Natalino Belo
Editór : Evaristo Soares Martins
