EKONOMIA, HEADLINE

Empreza japoneza planeia rekruta timor-oan serbisu iha área informátika no bee-moos

Empreza japoneza planeia rekruta timor-oan serbisu iha área informátika no bee-moos

Sekretáriu Estadu Formasaun Profisionál no Empregu (SEFOPE), Alarico do Rosário, hamutuk ho ekipa tékniku hala'o enkontru ho reprezentante empreza CWP Global hosi Japaun, iha salaun SEFOPE, Caicoli, kuarta (21/09). Imajen Tatoli/Francisco Sony

DILI, 21 setembru 2022 (TATOLI)—Sekretaria Estadu Formasaun Profisionál no Empregu (SEFOPE) no empreza CWP Global hosi Japaun, kuarta ne’e, hala’o enkontru kona-ba planu rekrutamentu timor-oan bá serbisu iha Japaun.

“Ita-nia enkontru hodi koa’lia kona-ba planu halo rekrutamentu timor-oan bá serbisu iha Japaun iha área informátika no sisteam bee-moos nian, oinsá estuda bee foer transforma sai bee-moos,” Diretór Jerál SEFOPE, Paulo Alves, hateten, iha edifísiu SEFOPE, Caicoli.

Nia dehan, durante enkontru ne’e, parte empreza hakarak molok timor-oan sira bá serbisu, tenke tuir uluk formasaun lian Japaun tanba sira-nia kritéria, traballadór tenke hatene lian Japaun no tenke iha sertifikadu ho nível IV.

“Ami sei tuur hamutuk halo diskusaun kona-ba termu legál, liuliu asina akordu entre Timor-Leste no Japaun atu fasilita sai hanesan baze legál ba atu proteje timor-oan sira,” nia akresenta.

Notísia relevante: Pandemia afeta oportunidade serbisu traballadór timor-oan bá Japaun

SEFOPE hanesan instituisaun governamentál ne’ebé halo mobilizasaun ba timor-oan sira ba rai-li’ur, sei fó sai avizu ba joven timor-oan hotu ne’ebé iha interese tenke tuir formasaun hodi prienxe kritériu.

Iha fatin hanesan, Prezidente empreza CWP Global, Kon Yosuke, hateten, kooperasaun ne’ebé halo atu fó oportunidade ba timor-oan halo dezenvolvimentu iha Timor-Leste.

“Ami hakarak timor-oan serbisu iha área informátika no teknolojia hodi halo sistema ne’ebé di’ak liután. Empreza CWP Global foin mak harii no seidauk to’o tinan-ida tanba ne’e tinan oin mak bele hahú halo rekrutamentu ho númeru kiik lai,” nia tenik.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!