DILI, 21 setembru 2022 (TATOLI)—Governu liuhosi reuniaun Konsellu Ministru (KM) ordinária, kuarta ne’e, aprova projetu dekretu-lei, kona-ba kriasaun Institutu Nasionál Saúde Públika Timor-Leste (INSP-TL).
“Projetu dekretu-lei ne’ebé aprezenta hosi Ministra Saúde, Odete Maria Freitas Belo, ne’e hetan ona aprovasaun iha Konsellu Ministru, nune’e ita sei iha Institutu Nasionál Saúde Públika,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun Ezekutivu ne’e, iha Palásiu Governu.
Notísia relevante: Ministériu Saúde prioritiza saúde públika iha OJE 2022
Kriasaun INSP-TL ho objetivu atu tau hamutuk servisu monitoriza, avalia no análize estadu jerál saúde iha institutu úniku, nune’e bele kolabora iha vijilánsia epidemiolójika no sanitária, investigasaun sientífika, kontrolu risku no ameasa ba saúde públika, dezenvolvimentu no formasaun rekursu umanu, peskiza no inkorporasaun teknolójika iha saúde públika, inklui kontrolu kualidade iha área saúde ne’ebé determina ona.
Atribuisaun servisu sira mai ho kooperasaun ho institutu sira iha país sira seluk, nune’e bele kria organizasaun ida ho baze sientífika ne’ebé forte, fó lideransa no esperiénsia ba esforsu iha nível nasionál atu alkansa melloria substansiál iha tempu naruk ba saúde públika inklui afirma-an nu’udár fonte viável ba akonsellamentu hodi formula no foti desizaun hosi responsavel polítiku sira.
Jornalista : Antónia Gusmão
Editora : Julia Chatarina
