iklan

HEADLINE, SAÚDE

MS estabelese ona sentru hapara fuma tabaku iha munisípiu tolu

MS estabelese ona sentru hapara fuma tabaku iha munisípiu tolu

Fuma sigaru bele mós hamosu kankru ran. imajen/google.

DILI, 21 setembru 2022 (TATOLI)—Xefe Deparatmentu Moras La Hada’et iha Ministériu Saúde, Hector da Costa Perreia, hateten daudaun ne’e, Ministériu Saúde estabelese ona sentru hapara fuma tabaku, iha munisípiu tolu hanesan Ainaro, Ermera no Liquiça.

“Ita estebelese sentru ne’e iha munisípiu tolu ho objetivu ida katak ba maluk sira ne’ebé mak hakarak husik fuma tabaku bele ba konsulta ka simu ai-moruk consoling ruma iha sentru hapara fuma ne’ebé mak besik, atu nune’e labele kontinua fuma tan,” Xefe Deparatmentu ne’e hateten ba jornalista sira iha City8-Manleuana, DilI, kuarta ne’e.

Ministériu Saúde estebelese ida ne’e bazeia ba nesesidade, liuliu ba populasaun sira nia ezijénsia atu hapara fuma sigarru.

“Kona bá munisípiu tolu ne’ebé estabelese ona fatin hapara fuma aimoruk sufisiente hodi halo atendimentu  ba ema ne’ebé mak hakarak hapara fuma,”  katak nia.

Iha munisípiu Dili, nia dehan MS komesa hanoin atu estabelese tanba sentru hapara fuma iha sentru Internamentu Vera-Kruz, Becora no Hera tanba sentru hapara fuma iha Sentru Saúde Formoza ne’e ema mai barak tebes.

“Ita hakarak estabelese tan ba fasilidade hotu-hotu hodi fasilita populasaun sira labele la’o dook atu nune’e bele apoia oinsá atu hapara fuma,” nia afirma.

Ba munisípiu sira seluk, nia dehan tempu badak Ministériu Saúde sei estabelese hotu sentru hapara fuma, atu nune’e populasaun sira ne’ebé mak hakarak hapara fuma tabaku bele asesu.

Iha fatin hanesan, Diretór Ezekutivu Aliansa Nasionál Kontrolu Tabaku iha Timor-Leste Sancho Fernandes, informa sentru hapara fuma ne’ebé mak estabelese iha Formoza ne’e hatudu progressu  di’ak   tanba fumador sira kuaze 300 ka 90% ne’e hapara ona fuma.

“Ha’u hanoin katak Ministériu Saúde bele halo sosializasaun ba sentru  hapara fuma ne’ebé estabelese ona atu kontinua habelar ba komunidade sira hodi bele hakbesik aan no hapara fuma,” nia afirma.

Jornalista : Felicidade Ximenes

Editór      : Florencio Miranda Ximenes

iklan
iklan

Leave a Reply

iklan
error: Content is protected !!