DILI, HEADLINE

Ohin, PR Horta dezloka ba Nova Iorke partisipa asembleia jerál ONU

Ohin, PR Horta dezloka ba Nova Iorke partisipa asembleia jerál ONU

Prezidente repúblika (PR), José Ramos Horta, ho delegasaun, dezloka ona ba Nova Iorke hodi partisipa iha asembleia jerál Organizasaun Nasaun Unida (ONU), kuarta (21/09). Imajen Tatoli/Egas Cristóvão

DILI, 21 setembru 2022 (TATOLI)—Prezidente Repúblika (PR), José Ramos Horta, ho delegasaun, kuarta ne’e, dezloka ona ba Nova Iorke hodi partisipa iha asembleia jerál Organizasaun Nasaun Unida (ONU) nian ba dala-77.

Tuir observasaun jornalista Agéncia Tatoli iha terrenu hatudu, Xefe Estadu ho delegasaun voo ho aviaun Batik Indonézia PK-LUV dezloka hosi Aeroportu Internasionál Nicolau Lobato, Comoro, iha tuku 11h13 dadeer.

Antes atu sa’e aviaun, Xefe Estadu simu ho parada militár hosi FALINTIL-Forsa Defeza Timor-Leste (F-FDTL), no iha dezlokasaun ne’e marka prezensa Primeiru-Ministru (PM), Taur Matan Ruak no akompañadu hosi membru Governu.

Enkuantu, iha enkontru asembleia jerál ONU ne’e Xefe Estadu mós sei hato’o diskursu Estadu Timor-Leste nian, ne’ebés sei ko’alia asuntu nasionál no sei sai hanesan relatóriu ne’ebé pozitivu ba komunidade internasionál kona-ba situasaun iha Timor-Leste.

“Más ha’u nu’udar Xefe Estadu, ha’u la ko’alia lori ha’u-nia naran pesoál. Ha’u lori naran Estadu nian. Entaun ha’u-nia diskursu kuaze bele hateten, relatóriu ida Timor-Leste nian ba komunidade internasionál kona-ba progresu ké Timor-Leste halo iha pás, seguransa iha rai-laran, iha toleránsia polítika, toleránsia rekonsiliasaun Timor-Leste nian ké ita rai ida segundu maiór país katóliku iha mundu ho minória musulmanu no protestante, maibé relasaun ho komunidade sira seluk di’ak tebe-tebes, laiha konflitu relijiaun, laiha konflitu étniku, ne’e relatóriu ida di’ak ba mundu,” PR Horta hateten.

Ba Xefe Estadu, Asembleia Jerál sei ko’alia mós kona-ba situasaun iha Ukránia ne’ebé iha fó impaktu ba mundu, adezaun Timor-Leste ba ASEAN, Organizasaun Mundiál Komérsiu (OMK), susesu Timor-Leste iha mitigasaun no kombate ba pandemia COVID-19 no seluk tan.

Durante iha Nova Iorke, Xefe Estadu mós sei hala’o enkontru bilaterál ho Primeira-Ministra Nova Zelándia, Jacinta Ardern, Primeiru-Ministru Kambodia, Hun Sen, Prezidente Kosovo no juíz hosi tribunál antí korrupsaun internasionál, Juíz Mark Wolf.

Iha ne’ebá, sei halo enkontru ho Senadór Patrick Dodson, enviadu espesiál ba rekonsiliasaun no implementasaun kona-ba deklarasaun Uluru hodi fuan, no partisipa mós iha simeira altu-nível g7+ nian.

Entretantu, Xefe Estadu ho delegasaun, sei fila hikas mai Timor-Leste, iha loron 27 setembru 2022.

Notósia Relevante: PN aprova pedidu PR Horta vizita Austrália no EUA

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!