iklan

EKONOMIA, BOBONARO, HEADLINE, MUNISÍPIU

PNDS finaliza ona projetu RSS 15 iha postu Bobonaro

PNDS finaliza ona projetu RSS 15 iha postu Bobonaro

Diretór Delegasaun PNDS Munisípiu Bobonaro, Paulino Viegas Tilman. Imagen Tatoli/Sérgio da Cruz.

BOBONARO, 21 Septembru 2022 (TATOLI)—Programa Nasionál Dezenvolvimentu Suku (PNDS) munisípiu Bobonaro, lideradu Paulino Viegas Tilman, finaliza ona projetu Reabilitasaun Sede Suku (RSS) siklu daruak hamutuk unidade 15 iha postu administrativu Bobonaro no oras ne’e falta de’it sede suku tolu.

Sede suku ne’ebé finaliza ona reabilitasaun mak hanesan suku Leber, Tapo, Oe-Leu, Malilait, Bobonaro, Lourba, Lour, Ilatlaun, Tebabui, Atu Aben, Soi Leço, Kota Boot, Maliubu no suku Sibuni.

Notísia relevante: Progresu reablitasaun sede suku Oe-leu atinje 45%

Enkuantu sede suku Molop, Colimau no Carabau mak sei iha faze finalizasaun.

“Iha Bobonaro nian 15 suku 100% tiha ona, falta suku tolu mak iha prosesu finalizasaun nia laran, nia progresu kiik-liu mak suku Molop ninian, maibé nia mós halo ona progresu to’o 20%,” Diretór PNDS munisípiu Bobonaro, Paulino Viegas Tilman, informa ba Tatoli, iha Bobonaro.

Reabilitasaun ne’e rasik re-dezeña tuir modelu tékniku PNDS nian, ne’ebé kompleta ho prototipu no elementu asesibilidade ba ema ho defisiénsia ne’ebé muda ona hosi ninia orijinalidade.

Enkuantu Projetu RSS ne’e PNDS implementa fazeadamente, dahuluk iha postu administrativu Atabae no Cailaco hamutuk 14.

Faze daruak iha postu administrativu Bobonaro hamutuk 18 no faze datoluk mak sei implementa iha postu administrativu Balibo no Lolotoe no faze ikus liu mak implementa iha postu administrativu Maliana.

Diretór Paulino husu ba autoridade lokál no komunidade sira atu utiliza didi’ak sede suku hirak-ne’e hodi halo serbisu administrasaun suku.

“Kuandu komunidade sira la konsidera sede suku ninia sentru atendimentu administrasaun, ne’e kontra regra no kabe mós ba kompeténsia xefe suku atu buka tuir ema ne’e atu justifika tansa nia halo nune’e hodi asume responsablidade ba fallansu ne’ebé nia halo,” nia apela.

Tuir dadus estatístika 2020, munisípiu Bobonaro iha aldeia 193, suku 50, postu administrativu neen, kompostu hosi Atabae, Balibo, Cailaco, Maliana, Bobonaro no Lolotoe, ho totál populasaun 128,522 komposta hosi feto 57,835, mane 70,687 ho totál xefe familía 28,940.

Jornalista        : Sérgio da Cruz

Editór              : Evaristo Soares Martins

iklan
iklan

Leave a Reply

iklan
error: Content is protected !!