Prezidente Autoridade RAEOA despede ho ekipa delegasaun dezloka ba Kefamenanu
OÉ-CUSSE, 21 setembru 2022 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, kuarta ne’e despedida ho ekipa delegasaun hodi ba partisipa iha selebrasaun aniversáriu tinan-100 Timor Tenggah Utara (TTU), sidade Kefamenanu, Repúblika Indonésia (RI).
Ekipa delegasaun ne’e kuaze ema na’in-50 dezloka ba TTU liuhosi fronteira terrestre Sakato-Wini iha tuku 09:00 dadersan, ne’ebé xefia hosi Adjunta Prezidente Autoridade Asuntu Reforsu Institusionál, Leonia da Costa Monteiro akompaña hosi Sekretáriu Rejionál ba Asuntu Agrikultura, José Eta no Sekretáriu Rejionál ba Asuntu Turizmu Komunitária, Pedro da Silva Boquifai.
Prezidente Autoridade RAEOA, Arsénio Paixa Bano, informa, antes ne’e grupu ida dezloka iha segunda 19 setembru, maioria grupu produtu lokál sira atu aprezenta produtu lokál iha espozisaun durante durante loron-haat iha selebrasaun aniversáriu tinan-100 TTU, ne’ebé xefia hosi xefe departamentu no diretór rejionál sira.
“Tanba saida mak autoridade partisipa, tanba TTU selebra aniversáriu sidade Kefamenanu ba tinan-100, iha biban ne’e mós ita ba tanba ita hakarak aprende no haree komunidade iha rai viziñu, sira halo sasán no dezenvolve oinsá, hanesan produtu tais to’o produtu lokál, sira-nia produsaun oinsá, mezmu ita iha ona maibé Oé-Cusse hakarak aprende nafatin, atu fila mai dezenvolve iha Oé-Cusse,” Arsénio Bano ko’alia iha serimónia despedida iha Gabinete autoridade ZEESM Oé-Cusse.
Nune’e mos iha objetivu seluk, atu hametin relasaun entre komunidade iha liña fronteira, Oé-Cusse la presiza ba dook atu aprende, tanba Oé-Cusse komesa aprende daudaun halo rasik ninian ona, entaun presiza haree tán uitoan iha viziñu sira, nune’e aumenta koñesimentu implementa iha rejiaun ne’e rasik.
Tuir ajenda prinsipál ne’e sei hala’o iha kabupaten TTU, maka hanesan, estudu komparativu, espozisaun aprenzenta produtu originál hosi Oé-Cusse, karnavál kulturál, jogu amizade no seluk tán.
Notísia relevante: Prezidente Autoridade RAEOA despede ho ekipa delegasaun dezloka ba Kefamenanu
Jornalista: Abílio Elo Nini
Editór: Evaristo Soares Martins
