HEADLINE, INTERNASIONÁL, OÉ-CUSSE (RAEOA)

Aniversáriu sidade Kefamenanu, nu’udar opurtunidade hametin kooperasaun entre RAEOA-TTU

Aniversáriu sidade Kefamenanu, nu’udar opurtunidade hametin kooperasaun entre RAEOA-TTU

Autoridade RAEOA partisipa aniversáriu dékada ida (tinan 100) sidade Kefamenanu. Imajen Tatoli/Abílio Elo Nini.

KEFAMENANU 22 setembru 2022 (TATOLI) – Komemorasaun loron aniversáriu ba tinan-100 sidade Kefamenanu sai hanesan momentu importante hodi hametin relasaun indetidade kultura no hametin kooperasaun entre komunidade Rejiaun Administrativa Espesiál Oé-Cusse Ambeno (RAEOA) ho komunidade Timur Tengah Utara TTU.

Adjunta Prezidente Autoridade RAEOA, Leonia da Costa Monteiro, ne’ebé reprezenta Prezidente Autoridade, partisipa iha komemorasaun loron aniversáriu sidade Kefamenanu ba tinan-100, ne’ebé akompaña hosi Sekretáriu Rejionál ba Asuntu Agrikultura, José Eta no Sekretáriu Rejionál ba Asuntu Komérsiu no Indústria Pedro da Silva Baquifai.

Komemorasaun loron aniversáriu Kefamenanu ba tinan-100, realiza ho seremónia isar bandeira Repúblika Indonézia, ne’ebé hala’o iha kampu futeból Oemanu, distritu TTU, dirije direitamente hosi Prezidente Autoridade TTU, Juandi Davis.

Iha ámbitu komemorasaun ne’e, Leonia Monteiro, hatete, komemorasaun ne’e sai hanesan momentu importante ba rai rua, hodi hametin relasaun ba identidade kultura entre komunidade Oé-Cusse ho TTU tanba politikamente hafahe iha fronteira maibé kona-bá kultura kauze hanesan.

“Ami hato’o agradese tanba konvida Autoridade RAEOA hodi hola parte iha selebrasaun ne’e, momumentu ida-ne’e importante tebes ba ami, tanba liuhosi loron aniversáriu sidade Kefamanenu bele hametin ita-nia relasaun identidade nu’udar lian Baikeno ho kultura hanesan, maske hafahe iha fronteira maibé ba kultura no tradisaun hanesan iha,” Adjunta Prezidente Autoridade RAEOA, Leonia da Costa Monteiro, ko’alia iha Kefamenanu, kinta ne’e.

Nune’e hanesan reprezentante povu Oé-Cusse hato’o parabéns ba povu TTU tanba iha 2022 ne’e, sai istória foun ba sidade Kefamenanu nia loron moris dezde uluk to’o ohin loron.

Presidente Autoridades TTU, Juandi David, iha nia dikursu, hato’o parabens ba populasaun iha territóriu TTU espesiál kota Kefamenanu, espera liuhosi aniversáriu ne’e bele fó kbiit no forsa hodi dudu prosesu dezenvolvimentu iha setór infraestrutura.

“Momentu selebrasaun aniversáriu sidade Kefamenanu tinan ne’e, bele sai hanesan reflesaun no korresaun hodi sukat ita-nia forsa no kontribuisaun hosi komunidade liuliu kona-bá dezenvolvimentu iha sidade Kefamenanu,” nia afirma.

Tan ne’e maka atu apoia prosesu dezenvolvimentu iha sidade Kefamenanu, dahuluk presiza promove solidariedade ba malu, daruak sidade tenke mós no sai matak, datoluk presiza kria unidade iha sosiedade nia leet, dahaat presiza dezenvolve-aan hahú hosi aldeia suku to’o sub-rejiaun sira, ida-ne’e mak kontribuisaun ba prosesu dezenvolve ba sidade ne’e iha futuru.

“Prioridade haat ne’e presiza ita hotu nia reflesaun hodi mehi luta ba futuru nian, sidade Kefamenanu tenke sai armónia, sidade pás no estabilidade iha no sai ezemplu iha Indonézia,” nia katak.

Nune’e autoridade apela ba komunidade TTU kontinua serbisu maka’as hodi kontribui dezenvolve sidade Kefamenanu sai furak no matak, tanba dezenvolvimentu atu la’o la’os setór infraestrutura no ekonómia de’it, maibé iha setór seluk presiza tau matan, nune’e bele kontibui ba prosesu dezenvolvimentu iha TTU.

Jornalista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!