EDUKASAUN, HEADLINE

Dosente orgullu estudante defisiente matan termina ezame monografia ho valór exelente

Dosente orgullu estudante defisiente matan termina ezame monografia ho valór exelente

Estudante UNTL, João Barreto, partisipa ezame monografia nível baxaleratu, kinta (22/09). Imajen/Tomé Amado

DILI, 22 setembru 2022 (TATOLI)—Vise-Dekanu ne’ebé trata asuntu Administrasaun no Finansa, Julio Aparício, konsidera foin ba dahuluk Universidade Nasionál Timor-Lorosa’e (UNTL) realiza ezame monografia ba estudante ida ho naran João Barreto, ho kondisaun defisiénsia matan, to’o bele finaliza ezame monografia ho valór exelente (A).

“Ami nu’udar dosente orgullu tebes haree ami-nia estudante, maski iha problema ho matan maibé bele finaliza hakerek liuhosi letra braille no daudaun nia iha prosesu ezame monografia nia laran. Ba ha’u pesoál, hanesan milagre ida no ha’u mós bele dehan foin ba dahuluk akontese iha Timor-Leste no iha Instituisaun Ensinu Superiór nia laran, estudante ida ho problema matan mai defende ninia ezame monografia iha nível baxarelatu,” Vise-Dekanu hateten iha ninia knaar fatin, kampus PASPOL, Caicoli, kinta ne’e.

Tuir dosente ne’e, nu’udar manorin-na’in no inisiadór hodi forma Departamentu Inkluzaun Sosiál iha Fakuldade Siénsia Sosiál, durante ne’e iha ona estudante ho defisiénsia ain na’in-rua finaliza ona estudu nível diploma III no sei iha tan estudante defisiénsia na’in-lima agora iha hela estudu nia laran.

Notísia relevante: Estudante Universidade 42 kompete hakerek monografia

Maibé, ba estudante ho defisiénsia matan foin ba dahuluk akontese ho João Barreto, tanba ne’e UNTL sente orgullu no apresia tanba haree esforsu hosi estudante to’o hetan rezultadu di’ak ba ninia-an.

“Ida-ne’e nu’udar lisaun atu loke timor-oan hotu nia vizaun luan, katak moris ne’e la difisil hanesan buat ne’ebé iha. Ema ho defisiénsia hakarak eskola no ohin bele tuur hodi tuir ezame monografia, tanba sá mak ita ema normál labele,” nia tenik.

Nune’e mós, Diretora departamentu Inkluzaun Sosiál no Ezaminadora, Cecilia Pereira, relata, sira hatene katak estudante João Barreto nu’udar estudante ativu, ho matéria sira ne’ebé nia simu, hetan filafali apoiu ho letra braille.

“Ami-nia preokupasaun, nia mai tuir ezame monografia ne’e oinsá. Maibé orgullu boot tanba nia hetan orientadór ho ninia matenek no kapasidade tomak bele orienta preparasaun letra braille. Ha’u haree ninia aprezentasaun iha minutu 21 ne’e di’ak no kapas liu fali balun sira ne’ebé la ho defisiénsia matan,” nia dehan.

Tuir Ezaminadora, estudante ne’e konsege hato’o aprezentasaun iha ezame monografia tanba nia halo ona preparasaun másimu, maski nia la mai ho power point maibé nia bele halo aprezentasaun liuhosi pontu importante uza letra braille.

Ho nune’e, Ezaminadora to’o konkluzaun hodi fó valór A ba João Barreto, tanba sistema valorizasaun ne’ebé iha kuandu hosi 85 ba leten hetan A, 84-70 hetan B no restu hosi ne’e hetan C, enkuantu João Barreto hetan 85,6.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!