Governu sei haruka médiku 39 foti área espesializasaun iha Fiji no Cuba
DILI, 22 setembru 2022 (TATOLI) – Diretór Jerál Servisu Koorporativu Ministériu Saúde, Marcelo Amaral, informa tinan oin Ministériu Saúde sei haruka médiku hamutuk 39 ba nasaun Fiji no Cuba hodi foti área espesializasaun.
Médiku nain-sia sei ba nasaun Fiji no restu sei ba hotu Cuba hodi kontinua estudu iha área espesilializasaun nian.
“Rekrutamentu ba médiku jerál sira atu ba kontinua foti área espesializasaun iha ona prosesu entaun kestaun mak orsamentu tanba orsamentu ba ida ne’e iha tinan 2022 laiha tanba ne’e mak Ministra Saúde halo hela komunikasaun ofisiál ho Ministériu Ensinu Superiór hodi haree mekanizmu no disponibidade ruma atu bele apoiu ba kursu espesializasaun médiku jerál no enfermajen nian. Maibé karik orsamentu ba tinan ida ne’e la iha mak dalan seluk ita haruka iha tinan oin fulan marsu nia laran”, Diretór Jerál Servisu Koorporativu Ministériu Saúde, Marcelo Amaral, hateten iha City8 Manleuana.
Nia dehan, médiku sira ne’ebé mak Ministériu Saúde identifika hamutuk 39 iha área medisina no enfermajen liuliu iha onkoljia, radiolojia, kardiolojia no área sira seluk hodi kompleta nesesidade rai-laran nian.
“Agora daudaun ita halo diskusaun ho Fundu Dezenvolvimentu Kapitál Umanu (FDCH) no Ministériu Finansas mós aloka ona orsamentu ba FDCH hamutuk milaun 17 ba programa dezenvolvimentu kapitál umanu ba setór hotuhotu, entaun ami nia proposta haruka ona ba Ministériu Ensinu Superiór, espera katak sira konsidera. Tanba ita hotu hatene katak nesesidade ba médiku espesialista ne’e mais altu tanba ita nia ospitál sira presiza médiku espesialista”, revela.
Ministériu Saúde halo transferénsia pasiente ba rai liur ne’ebé gasta milaun 12, tanba ne’e Governu tenke investe rekursu umanu liuhosi formasaun ba espesialista sira atu nune’e bele investe rasik iha rai-laran.
“Agora depende ba Governu atu haree ida ne’ebé mak prioridade liu tanba médiku espesialista ne’e sei haree hotu povu tomak nia nesesidade entaun ita tenke tau kestaun sira ne’e mais urjente atu nune’e Governu bele konsentra no ita investe iha rai-laran ho objetivu bele redúz moras sira ne’ebé mak durante ita halo transferénsia ba rai-liur ne’e”, konklui.
Jornalista : Felicidade Ximenes
Editór : Zezito Silva
