BAUCAU, 23 setembru 2022 (TATOLI)– Finalista na’in-439 hosi Institutu Formasaun Dosente no Profisionál Edukasaun Timor-Leste (INFORDEPE) sesta ne’e, tuir graduasaun hosi Universidade Nasionál Timor-Leste (UNTL) iha Baucau.
Reitór UNTL, João Soares Martins, espresa sentimentu kontentE no orgullu tanba durante Timor-Leste ukun rasik-aan foin ba dahuluk hala’o serimónia graduasaun iha munisipiu inklui Baucau tinan-ne’e.
“Edukasaun pilár importante tebes entaun ita tenke fó formasaun di’ak ba profesór sira, ninia importánsia mak-ne’e forma profesór ida ho kualidade atu nune’e fó ensinu di’ak ba ita-nia oan sira ho di’ak, kualidade bele sai rekursu umanu ne’ebé mak kompetente ba serbí nasaun no konstrui nasaun ida-ne’e di’ak liután ba oin” Reitór UNTL hateten iha Sentru Konvensaun Baucau (CCB, sigla portugés), Vila Antiga.
Graduandu hirak-ne’e hosi fakuldade siénsia umanidade ne’ebé hala’o estudu durante tinan-haat hodi hasai baixarelatu iha INFORDEPE.
Graduasaun estudante UNTL baixarelatu ba-27 hatudu sinál importante tanba papél edukasaun ba dezenvolvimentu nasaun boot tebes nune’e presiza halo formasaun di’ak ba profesór sira ho di’ak, kualidade atu nune’e hanorin estudante sira iha kualidade
Finalista Lígia Guterres Brites, husu ba Ministériu edukasaun, juventude no desportu (MEJD) atu muda estatutu profesór kontratadu ba funsionáriu publiku tanba prienxe ona rekizitu.
Durante tinan-haat hosi tinan-2018 to’o tinan 2021 tuir formasaun edukasaun nível baixarelatu iha INFORDEPE liuhosi UNTL fó oportunidade atu profesór sira hasa’e koñesementu edukasaun hosi sekundáriu ba baixarelatu.
“Ha’u sente kontente tanba UNTL liuhosi INFORDEPE fó mai ami (profesór) sira kompleta ami-nia nível edukasaun hosi sekundária ba nível baixarelatu,” Lígia Brites akresenta.
Hosi tótal graduadu na’in-439 maihosi munisípiu tolu, kompostu hosi munisípiu Baucau na’in-249, Lautem 89 no Viqueque 101.
Jornalista : Natalino Belo
Editór : Evaristo Soares Martins
