Jerente saúde 22 hetan ona formasaun husi INS no São João de Deus
DILI, 23 setembru 2022 (TATOLI) — Institutu Nasionál Saúde no Parseiru São João de Deus, fó ona formasaun ba jerente saúde hamutuk na’in 22 hodi hasa’e sira nia koñesimentu atu halo mudansa iha institusaun refereida sira.
“Istitutu Naisonál Saúde (INS) no parseiru São João de Deus iha área formasaun ba jerente saúde sira hodi dezenvolve sira nia koñesimentu no abilidade profisionál no esperiensia atu bele lidera di’ak iha sira nia ekipa no iha ida idak nia instituisaun”, Diretora Ezekutiva Istitutu Naisonál Saúde (INS), Domingas da Costa Pereira, hateten iha nia diskursu iha ambitu serimónia graduasaun ba programa jerente saúde na’in 22 ba periodu da-neen iha salaun INS, Comoro, ohin.
Nia dehan, São João de Deus hanesan parseiru desenvolvimentu ida durante ne’e fó ona formasaun ba jerente saúde husi Hospitál Nasionál Guido Valadares no hospital referal sira, servisu saúde munisípiu no Ministériu Saúde ne’ebé hahú kedas iha tinan 2016, ho nune’e fó ona formasaun jerente saúde sira ohin na’in 22 no husi 102 mak forma hodi aplika ona iha instituisaun sira.
“Atu reforma administasaun, jerente sira presiza iha koñesimentu no abilidade profisionál sira ne’ebé mak iha liu husi formasaun jerente saúde hodi halo mudansa ba instituisaun ida idak tanba ne’e instituisaun nasionál saúde halo esforsu atu buka rekursu sufisiente hodi kapasita jerente sira iha nivel hotuhotu hodi responde no reforma administrasaun ka fatin servisu sira iha Minsitériu Saúde” revela.
Iha fatin hanesan, Coutry Manager, São João de Deus iha Timor Leste , Lourenco Camnahas, hateten São João de Deus halo parseria ho Governu liuliu Ministériu Saúde hodi bele fó ona formasaun ba jerente saúde sira ho di’ak.
“Ami durante ne’e fó formasaun ba parteira no enfermejen sira liuhusi eleva kapaisdade ospital nian no mos eleva kapasidade enfeimeiru no parteira hanesan sai jestór di’ak iha idaidak nia instituisaun hodi fó atendimentu ba pasiente sira”, Lourenco Camnahas refere.
Nune’e, Minsitra Saúde, Odete Maria Freitas, informa Governu servisu hamutuk ho parseiru sira hodi fó formasaun ba jerente saúde nian, entaun fila fali ba profisonál sira oinsá sira aprende bele aplika fila fali iha ida idak nia instituisaun.
“Maibé ita-nia esperansa mak bainhira pesoál saúde ida fraku iha abilidade mak ami nia obrigasaun fó kapasitasaun entaun formasaun ida ne’e mak ita fó ona ba sira hanesan jestór oinsá bele aplika iha instituisaun maibé iha fator balun influensia sira hanesan lojistika la iha aimoruk, entaun ida ne’e mós sai bareira ba sira atu implementa matenek ne’ebé sira iha”, Odete Maria Freitas Belo hateten.
Partisipa iha formsaun ne’e mak jerente saúde mai husi Hospitál Nasionál Guido Valadres (HNGV) Ministériu Saúde, Hospitál Eduardo Ximenes Baucau, Hospitál referal Maliana no Hospitál Referal Maubesi.
Jornalista : Felicidade Ximenes
Editor : Zezito Silva
