DILI, 23 setembru 2022 (TATOLI)-Polísia Nasionál Timor-Leste (PNTL) liuhosi Polísia Nasionál Serbisu Investigasaun Kriminál (PNSIK), horisehik, maizumenus tuku 9:00 halo apreensaun ba kamioneta tolu husi Indonézia ho xapa matrikula DH8514, DH8436 no DH38132, tanba la selu taxa ba alfandega bainhira tula nesesidade bázika.
“Kamioneta sira ne’e halo pagamentu taxa ho de’it pursentu 20, pursentu 80 la selu impostu ba Autotidade Aduneira (Alfándega) ne’ebé maka iha fronteira Postu Mota-Ain Batugade”, Portavós Komandu Jerál PNTL, Superintendente Xefe Armando Monteiro, ba jornalista iha Komandu Jerál PNTL Kaikoli, sesta ne’e.
Apreensaun ne’e halo, nia dehan simu informasaun hosi serbisu Sekretu Intelejénsia Polísia (SIP). Daudaun ne’e asegura ona kamioneta ho evidénsia seluk hodi submete ba prosesu identifikasaun no investigasaun.
Nia haktuir apreensaun akontese, tanba motorista hosi kamioneta sira ne’e tenta ses aan hosi autoridade alfandega, bainhira parte aduneira halo inspesaun ba sasán sira iha kamioneta laran.
“Nune’e ita nia parte serbisu sekretu informa kedan ba PNSIK no horisehik halo kedan apreensaun ba kamioneta tolu bainhira tenta halo sira nia movimentu iha Dili laran”, katak nia.
Monteiro akresenta, sasán ne’ebé halo ona pagamentu ba taxa ho pursentu 20, autoridade polisiál sei entrega ba nain. Enkuantu, pursentu 80 PNTL sei halo auto-notísia hodi entrega ba ministériu públiku hodi loke prosesu investigasaun.
Tuir observasaun, kamioneta rua mak nakonu ho nesesidade bázika hanesan supermie, mina sona, dose no bee. Enkuantu kamioneta ida seluk nakonu ho manu-nia tolun rak, vazu ai-funan inklui pesa motór ne’ebé ema balun enkomenda hosi Kupaun. Nesesidade bázika sira ne’e atu distribui ba loja sira iha Dili laran.
Jornalista : Natalino Costa
Editora : Rita Almeida
