DILI, 22 setembru 2022 (TATOLI)—Koordenadór Jerál ba Unidade Kooperasaun Parseria (UCP, sigla portugés), iha Ministériu Solidariedade Sosiál no Inkluzaun (MSSI), João Coimbra, hateten preparasaun subsídiu anuál $200 ba uma kain ne’e besik atinje ona 75%.
Notísia Relevante: Subsídiu $200 ba uma kain, MAE simu dadus provizóriu rihun 400-resin
“Téknikamente, preparativu ba subsídiu anuál $200 ne’e besik atinje ona 75%, hein de’it kompleta tan dadus hosi Ministériu Administrasaun Estatál (MAE). Parte tékniku ho Estatál konsolida hela dadus hosi suku sira iha territóriu nasionál,” João Coimbra hateten ba Agênica Tatoli, iha nia kna’ar fatin Caicoli, Dili, kinta ne’e.
Baze fundamentál atu fó subsídiu $200 ne’e hosi Dekretu-Lei númeru 37/2022 ne’ebé hateten katak subsídiu hosi Estadu ne’e ba uma kain sira hotu iha Timor-Leste no désimu terseiru ne’e aplika ba funsionáriu públiku de’it.
“Désimu terseiru nia aplikasaun ba traballadór Estadu, entaun buat ne’ebé ita tenta atu halo subsídiu anuál ba família iha Timor-Leste. Tuir Dekretu-Lei númeru 37/2022 hateten katak subsídiu ne’e sei atribui ba uma kain iha Timor-Leste. Não é bem critério maibé iha Dekretu-Lei ne’e hateten katak sé mak sai benefisiáriu ne’e mak uma kain sira-ne’ebé rejistu iha livru suku nian to’o loron 28 fevereiru 2022,” nia dehan.
Koordenadór ne’e hakle’an, uma kain ne’ebé iha direitu mak sira-ne’ebé rejistu iha 28 fevereiru 2022 ba kotuk maibé hosi marsu mai oin ne’e sei laiha direitu tanba bazea ba Dekretu-Lei.
“Karik tinan oin iha entaun sira bele hetan maibé ba tinan ne’e sira sei lahetan direitu ne’e ka bele dehan hein opurtunidade seluk,” nia dehan.
Tanba iha Dekretu-Lei ne’e mós la ko’alia kona-ba eskluzaun de momento no iha ne’ebá deskreve de’it mak uma kain iha Timor-Leste signifika Prezidente Repúblika mós bele subsídiu $200 ba uma kain.
Nia dehan, iha dekretu-lei 37/2022, 25 maiu, kona-ba (Subsidiu de Fim de Ano Aos Uma Kain) iha artigu 1 alinea 2 ne’e hateten subsidiu anuál ba uma-kain ne’ebe mak fulneravel liu iha Timor-Leste.
Iha dekretu-lei ne’ebé hanesan, iha fali artigu 2 ne’e haktuir benefisiáriu ba subsídiu anuál ne’e ba uma ka’un sira-ne’ebé rejistu ona no iha “Livru Rejistu Uma Kain” iha suku ida iha territóriu nasionál ne’ebé previstu ona iha Diploma Ministeriál Númeru 49.2017, 23 agostu.
Husu kona-ba mekanizmu pagamentu, nia hatán, mekanizmu pagamentu ba subsídiu anuál $200 ne’ebé ami prepara mak kuaze hanesanho mekanizmu pagamentu COVID -19 tinan rua liubá nian, katak sei iha ekipa MSSI nian ne’ebé ba direta suku hodi halo pagamentu ba benefisiáriu sira.
Notísia Relevante: PR Lú Olo promulga subsídiu $200 ba Uma-Kain
Jornalista : Osória Marques
Editór : Cancio Ximenes
