iklan

DESPORTU, DILI, HEADLINE

PSHT atualiza ba SEJD kona-ba kongresu ne’ebé sei halao iha outubru

PSHT atualiza ba SEJD kona-ba kongresu ne’ebé sei halao iha outubru

Sekretáriu Estadu Juventude no Desportu, Abrão Saldanha. Imajen Tatoli/Francisco Sony

DILI, 23 setembru 2022 (TATOLI) – Sekretáriu Estadu Juventude no Desportu (SEJD), Abrão Saldanha hateten, reuniaun ho organizasaun Persaudaraan Setia Hati Terate (PSHT) hodi rona informasaun kona-bá kongresu ne’ebé sei hala’o iha outubru.

“Ami mak bolu sira mai iha-ne’e hodi ko’alia kona-bá sira-nia kongresu atu nune’e sira bele iha estrutura lejítimu ida hodi organiza PSHT,” Abrão ko’alia iha edifísiu SEJD, Dili, sesta ne’e.

Nune’e mós ko’alia kona-bá asuntu rua ne’ebé importante hanesan problema ne’ebé akontese iha fulan kotuk no serbisu legalizasaun arte-marsial ne’ebé antes ne’e seidauk kompletu.

“Ami ko’alia di’ak tebes, kona-ba problema sira-ne’e rezolve hotu ona, serbisu legalizasaun arte-marsial sira hanesan loke ranting iha fatin-fatin, ne’ebé seidauk rejistu, ne’ebé sira informa hotu ona mai ami, buat hotu la’o di’ak,” nia dehan.

Governu liuhosi SEJD sei apoia de’it atu hala’o kongresu ne’e, hamutuk estatutu atu la’o-tuir regulamentu no lei hirak-ne’ebé la’o hela.

Sekretáriu Jerál PSHT, Pedro Aparício relata, sira-nia parte preparadu no prontu atu realiza kongresu hodi hili estrutura foun.

“Ami prontu atu halo kongresu, organizasaun ida atu la’o di’ak ne’e estrutura tenke la’o tuir nia tempu, mandatu remata ona halo kongresu hodi troka malu, tuir ami-nia estatutu ne’e kada tinan lima halo kongresu,” dehan Pedro.

Tuir planu PSHT nian kongresu sei halao iha loron ikus fulan outubru nia laran.

Jornalista: Hortencio Sanchez

Editór: Evaristo Soares Martins

iklan
iklan

Leave a Reply

iklan
error: Content is protected !!