DILI, 24 setembru 2022 (TATOLI)-Prezidente Repúblika (PR), José Ramos Horta, iha loron 23 setembru ne’e, hala’o diskursu iha Asembleia Jerál ONU ba dala-77 no foka ba dezenvolvimentu iha rai-laran, situasaun pandemia no konjuntura polítika globál.
“Dezde re-eleitu iha fulan lima liubá foka ba ajenda doméstika, harii fonte entre órgaun ezekutivu, lejizlativu no judisiáriu, envolve komunidade rurál, urbana, joven no estudante, sosiedade sívil, líder relijioza sira, profisionál, agrikultura, negosiante, privadu no setór bankáriu, pás, inkluziva, haburas demokrasia no instituisaun demokrátika sira no hodi hamoris fali ekonomia ne’ebé mak fraku,” Xefe Estadu hato’o liuhosi hosi komunikadu imprensa ne’ebé Agência TATOLI asesu hosi Palásiu Prezidensiál, sábadu ne’e.
Xefe Estadu mós destaka serbisu ho Governu, Parlamentu Nasionál no parseiru dezenvolvimentu hodi kombate extrema pobreza, sub-nutrisaun no raes badak, liuhosi promosaun fó susu-been inan ba bebé no prevene susu-been formula, subsídiu no apoiu ba inan isin-rua no habelar edukasaun ba labarik.
Ramos Horta mós ko’alia kona-ba susesu Timor-Leste iha dezenvolvimentu setór saúde, liuliu númeru doutór ne’ebé atinje ona 1200 hodi atende populasaun millaun 1.5, esperansa moris ne’ebé atinje idade 71 no mós susesu iha mitigasaun no kombate COVID-19.
Relasiona ho kontextu global, Xefe Estadu hateten, populasaun iha Myanmar sente trai no abandonadu hosi komunidade internasionál.
“Sira husu, tanbasá iha diferente tratamentu, apoiu lalais no generoza ba populasaun sivíl no refujiadu iha Ukránia, apoiu militár sufistifikadu ba rezisténsia Ukránia, no laiha reasaun ba funu hasoru povu Mianmar, sira luta no mate. Konflitu iha Myanmar afeta ba seguransa no estabilidade iha nasaun viziñu. Ida-ne’e bele aumenta,” Xefe Estadu subliña liuhosi nota imprensa.
Tamba ne’e, Xefe Estadu defende nesesidade atu promove diálogu hodi rezolve Ukránia, Myanmar no krize seluk iha mundu no husu Sekretáriu Jerál no ninia enviadu espesiál sira atu serbisu maka’as hodi hamosu akordu cesar fogo, dame ne’ebé kompriensivu no permanente.
Xefe Estadu mós fó hanoin ba Rússia, Ukránia no NATO atu revee desizaun iha pasadu ne’ebé hamate-an, retira hosi zona fronteriza, hodi permite Ukranianu sira, hodi rekonstrui sira-nia rain no moris no Rússia, retira seguransa hosi zona fronteira.
Jornalista: Nelson de Sousa
Editór: Evaristo Soares Martins
