PR Horta ho Xanana selebra tinan 20 TL sai membru ba ONU
DILI, 24 setembru 2022 (TATOLI)-Prezidente Repúblika (PR), José Manuel Ramos Horta, ho Eis Primeiru Ministru, Xanana Gusmão no Ministra Negósiu Estranjeiru no Kooperasaun (MNEK), Adaljiza Magno, hamutuk ho delegasaun, iha loron 23 setembru ne’e, selebra tinan 20 Timor-Leste (TL) sai membru ba Organizasaun Nasaun Unida (ONU) ne’ebé hala’o iha sede ONU iha Nova Iorke, Estadu Unidu Amérika (EUA).
Timor-Leste sai membru ba ONU iha loron 23 setembru 2002, enkuantu, asembleia jerál ONU vota admisaun Timor-Leste ba ONU iha loron 27 setembru 2002, hafoin restaurasaun independénsia iha 20 maiu 2002, ne’ebé mai husi rezultadu konsulta populár iha 30 agostu 1999.
“Timor-Leste sai membru ba United Nation hahú kedas iha tinan 2002, hamriik ho nia misaun atu tulun nasaun hotu ne’ebé hasoru problema oinoin inklui mós ba Timor-Leste. Misaun ne’ebé United Nations hala’o ona ba Timor-Leste hanesan iha área edukasaun, sosiál, luta kontra direitu feto no labarik feto ne’ebé hasoru problema inklui iha área seluk,” Xefe Estadu hateten liuhosi komunikadu imprensa ne’ebé Agência TATOLI asesu, sábadu ne’e.
Xefe Estadu orgullu, tanba Timor-Leste hamriik hanesan nasaun soberania ho nasaun sira seluk iha mundu no hetan protesaun maka’as hosi organizasaun internasionál sira-ne’ebé sai lutu ba dezenvolvimentu Timor nian iha pasadu no ba futuru.
Remata serimónia, Prezidente Repúblika, José Ramos Horta ho delegasaun, kontinua hala’o enkontru biletarál ho Primeira-Ministra Nova Zelándia, Jacinda Ardern no Primeiru-Ministru Kambodia, Hun Sen iha sede ONU.
Enkontru refere atu reforsa liután kooperasaun bilateral entre Timor-Leste ho Nova Zelándia no Kambodia iha área importante sira-ne’ebé atu apoia Timor-Leste nia dezenvolvimentu.
Entretantu tuir ajenda, Xefe Estadu, José Ramos Horta sei hala’o enkontru ho Sekretáriu Jerál ONU, António Guterres, iha ONU Nova Iorke Estadu Unida Amérika.
Jornalista: Nelson de Sousa
Editór: Evaristo Soares Martins
