DILI, 26 setembru 2022 (TATOLI)-Komandante Polísia Nasionál Timor-Leste (PNTL) Munisípiu Dili, Superintendente Xefe Henrique da Costa, hateten Grupu Arte Marsiál (GAM) ne’ebé atu halo atividade treinu kalan tenke hetan lisensa ka autorizasaun hosi autoridade lokál.
“Ita sei nafatin monitoriza no kontrola, ita orienta ona ba Polísia Ofisiál Suku (OPS) sira atu koordena ho Xefe Suku no mós Xefe Aldeia sira, para karik hanesan iha ema ruma halo atividade treinu iha suku tenke husu lisensa ba autoridade sira ne’e, se ita nia autoridade sira ne’e autoriza maka sira (GAM) bele halo atividade treinu”, Superintendente Xefe Henrique da Costa ba jornalista sira iha Sentru Formasaun Polísia, Komoro, segunda ne’e.
Nia dehan, GAM kompromete ona sei halo tuir de’it segundu diretivu hosi Komisaun Reguladora Arte Marisiál (KRAM). “Ita presiza maka ne’e, hotuhotu tenke kumpre ba kompromisu sira no mós ba regra ne’ebé maka iha ona, nune’e la’o tuir nia dalan no regra”.
Komandu Dili iha sesta (23/9) ne’e, liuhosi operasaun konsege deteta grupu balun hosi Persaudaraaan Setia Hati Terate (PSHT) nain 26 ne’ebé halo treinu iha área Bekusse, postu administrativu Kristu Rei, munisípiu Dili, halo treinamentu sem koñesementu hosi autoridade lokál. Situasaun ne’e, parte PNTL atua ona tuir lei.
Notísia relevante: GAM tolu submete ona dokumentu ba KRAM
Jornalista : Natalino Costa
Editora : Rita Almeida
