iklan

COVALIMA, POLÍTIKA

Covalima finaliza ona PMOPA faze dahuluk

Covalima finaliza ona PMOPA faze dahuluk

Administradór Munisípiu Covalima, Francisco Andrade. Imajen Tatoli/Celestina Teles.

COVALIMA, 26 setembru 2022 (TATOLI)–Administradór Munisípiu Covalima, Francisco Andrade informa, implementasaun Programa Mão de Obra Postu Administrativu (PMOPA) iha munisípiu Covalima faze dahuluk finaliza ona.

“Implementa programa Mão de Obra ba faze dahuluk ita fianliza ona. Agora ita hein hela relatóriu implementa 50% ba faze dahuluk, ita hein sira-nia relatóriu nune’e ita prosesu no kontinua implementa ba faze daruak,” Autoridade Covalima Francisco Andrade relata ba jornalista sira, iha nia kna’ar fatin, Sukaer Laran, segunda ne’e.

Maske finaliza ona implementa programa Mão de Obra Postu Administrativu maibé administrasaun munisípiu Covalima ezije ba administradór sira atu submete relatóriu ba administrasaun munisípiu Covalima.

Tanba hosi postu administrative hitu (7) ne’e, postu administrativu  Fohorem, Fatumea, Tilomar fianliza ona relatóriu hein postu sira seluk ne’ebé sei hadi’a sira-nia relatóriu, nune’e bele submete ona.

“Tuir loloos implementa PMOPA faze daruak hahú implementa ona iha fulan-setembru, tanba administrasaun seidauk simu relatóriu. Ita la autoriza atu halo pagamentu ba faze daruak,” nia informa.

Tanba, atu halo monitorizasaun administradór mós forma ekipa konjunta hanesan hosi dirasaun planeamentu, fiskalizasaun no PDIM ne’ebé mak halo monitorizasaun ba projetu hotu implementa iha PMOPA, maibé atu hatene nia rezultadu bainhira submete ona relatóriu foin bele hatene tanba agora seidauk simu relatóriu.

Implementa PMOPA prióridade halo manutensaun no hamoos esgotu, manutensaun ba Estrada, hamoos lixu iha fatin públiku, tanba matadalan PMOPA ko’alia klaru katak labele halo konstrusaun foun maibé halo de’it manutensaun no hamoos esgotu.

Munisípiu Covalima hetan alokasaun (OJE 2022) hosi Ministériu Administrasaun Estatál (MAE) hamutuk $3,990.360 ne’ebé aloka ba saláriu no vensimentu, bens servisu, tranferénsia públiku, kapitál menór no Kapital Dezenvolvimentu, aumenta ho orsamentu ba Programa Mão de Obra Postu Administrativu (PMOPA).

Hosi totál orsamentu refere, MAE transfere orsamentu ba Programa Mão de Obra Postu Administrativu (PMOPA) iha Covalima hamutuk $782,102 ba iha konta bankaria  munisípiu nian.

Jornalista   : Celestina Teles

Editór        : Cancio Ximenes

iklan
iklan

Leave a Reply

iklan
error: Content is protected !!